CBI-i Ram Rahim anema ano nisung tepsetba ken o ana angadang tenzükogo

Chandigarh, September 16 (Agencies): Central Bureau of Investigation (CBI) special court-i maneni Dera Sacha Sauda tongti, Gurmeet Ram Rahim Singh anema nisung tepsetba ken o ana angadang tenzükogo.
Nisung tepsetba ken oji video conferencing ajanga angadanger.
CBI court-i journalist, Ram Chander Chhatrapati aser taoba mapang Dera manager, Ranjit Singh na tepsetba ken o angadanger.
Iba dak sendakba nung Haryana state kübok Panchkula jila nung security akhangshiogo. Director General of Police, BS Sandhu-i ashiba agi, court complex aser Panchkula jila na nung para military aser Haryana Police peria mapa lemzüktsüogo.
Tetsür chanu ana tashiyim amshia raksatsüba ken o nung CBI court-i August 28 nü Ram Rahim küm 20 tepoukdak ayutsü obendang agüja liasü.
Ken o ana nung aitsüba sülen Haryana, Punjab aser Rajasthan tesem aika nung rara adoka nisung aika asü; Haryana nung nisung 42 asü saka Punjab o Rajasthan na nungbo nisung asüba osangbo maliasü.
Sirsa nung amenoka aliba journalist, Chhatrapati ya 2002 küm October ita nung khaset aser taoba mapang Dera manager, Ranjit Singh-a 2002 küm khaseta liasü.