CD&HG Raising Day salem metetdaktsür

Dimapur, December 5 (TYO): Nagaland Governor aser Chief Minister naprongi sangdong balala nung Nagaland Home Guards and Civil Defence indang Raising Day atema salem osang metetdaktsü.
Raising Day ji December 6, 2017 nü amunger aser Governor-i ashiba agi, Nagaland CD & HG ajanga nübor tenzükba wadang nung mapa tajung inyaker.
CD & HG züngsemtemi linük nung sepaitem aser Civil Administration den yariteper aser maparen aika nung shilem agia inyaker, ta Acharya-isa ashi.
Nagaland sorkari Home Guard tem indang honorarium anogo nung sen 150 aliba nung 520 kümtsüba atema pelar. Iba ya ajanga Home Guard kibongtem aser rongsenren jenjang tajungba akümtsü ta ni imlar, ta paisa shisem.
TR Zeliang-ia sangdong ka nung Nagaland Civil Defence and Home Guards (CD&HG)-i tanga state tem den külemi Raising Day amungba atema kanga pelar ta metetdaktsü.
CD&HG-i State Police aser Civil Administration den tongi shilem ka ama yariteper aser mapa tajung inyak arur. Tanü CD&HG ya reserve force ka ama dang masü saka State Disaster Response Force nunga tongti shilem agir, ta Nagaland chief minister-isa ashi.