Chakma aser Hajong onük anema AAPSU-i lungkak ait

Itanagar, September 19 (Agencies): Arunachal Pradesh nung All Arunachal Pradesh Students’ Union (AAPSU)-i tanü anogo piyong mokdangtsü sentong ayonga agidang ozüng alema mapa inyakba tatalokbatem liasü.
Itanagar nung mokdang pusemertemi tanep state transport bus aser nija gari ka nung mi senoktsüba den külemi tanga gari aika raksatsü, ta SP Sagar Singh Kalsi-i osangbener dang ashi.
Namsai, Changlang aser tanga district tem nunga ozüng alema mapa inyakba osangtem lir.
Tanü sorkar office, shisaliok rejutem aser shishilembadak ajak shibang aser public o private transport mesenzü.
Tanepbo state transport bus gari kar senzütsü tenzük saka kobi melii garitemji mesenzüdaktsüi sota ayu, ta police-i ashi.
Union Home Ministry-i tawa Arunachal Pradesh nung Chakma aser Hajong refugee tem nem senso agütsütsü telemtetba agiba anema AAPSU-i tanü lungkak aitba sentongji ayongzüka agiba liasü.