Children Film Bonanza mapang ‘Nani Teri Morni’ film sayatsü

Kohima, Mongputeni/October 06 (TYO): Mumbai nung alir Indian film director aser scriptwriter, Akashaditya Lama indang film ‘Nani Teri Morni’, Mongputeni/October 9, 2018 nü Kohima nung Children Film Bonanza aliba mapang sayatsü.
Iba film otsü ya 2015 küm national bravery award agizükla, Mhonbeni Ezung otsü nung ajemdaker yanglu. Lai tasü itta tetsü (otsüla) kümzüka liasü.
“Promoting Every Child’s Right to Entertainment” omen nung ajemdaker Children’s Film Society, India (CFSI)-i Mongputeni/October 9 nungi 13 nü tashi RCEMPA Auditorium, Kohima nung “Children Film Bonanza” ayongzükogo.
Iba festival ya Department balala- Social Welfare and Art & Culture, Youth Resources & Sports, School Education aser Information & Public Relations-i yaritepa ayongzüker.
Iba sentong nung adentsüpurtemji sorkar aser nija school tem naprongla nungi Class V nungi Class XII kaketshirtem asütsü.
Iba film Director, Lama ya Ranchi, Bihar (tangbo Jharkhand) nung aso aser Kolkata (West Bengal) Bhilai (Chhattisgarh) Gwalior (Madhya Pradesh) nung intet, aser 1996-97 küm pai Mechanical Engineering diploma angu.
1998 küm mezüng pai films aser television nung ajemoka Ad films nung yaritepa liasü.
Pai assistant director, screenplay writer, dialogue writer, theatre artist, playwright, script writer inyaka aruogo aser feature film, Cigarette Ki Tarah direct süa liasü.
Paisa film Lahore otsü nung yaritepa liasü; iba film ya National Film Awards ana angusang, Sanjay Puran Singh Chauhan-i direct asü.
Paisa Chauhan indang directorial venture Chanda Mama Door Ke nung yaritepa liasü. Lama-isa India nung kanga nüngtugu Hindi play ‘Mohenjodare’ otsü zülu aser co-produce asü.
Mumbai Film Industry nungi film rangben Nagaland nung tangokba mezüng director-producer ji pa asutsü.