China nunger Pastor ka Hong Kong-i meyok

Chengdu/Sichuan, September 13 (Agencies): Mongulbarnü China ketdangsertemi pastor ka Hong Kong nung Khristan training sentong ka nung adentsü atema meyoki sota ayu.
September 12, 2017 anepdang 6:00 ako meta Autumn Rain Blessing Church pastor Wang Yi aser pa kinungtsü Jiang Rong na Chengdu, Sichuan nungi Three-Fold Vision Training Conference nung adentsü atema apuso. Iba Christian training session ji Hong Kong nung agir.
Police-i Wang aser Jiang na sülen anidak aser anepdang 7:00 ako meta sorkar ketdangsertem Wang customs nung apu.
Qingyang District nung governmental sub-bureau ketdangsertemi pa Dongpo Police Station-i anir ao aser idakji ghonda ka shi ayuba sülen kidangi meyipa yok.
Pa police station nung ayudang Wang-i ketdangsertem dang pa kechiba mungdang nung medendaktsür ta asüngdang aser iba indang kuliji tezüluba nung meshi.
Ajisüaka, ketdangsertemi parnok ket nung tezüluba mali aser iba tetuyuba ya temaba ketdangsertem nungi agütsüba liasü ta langzü.
Wang kinungtsü Jiang bo Hong Kong tongogo. 2015 küm iba mungdang nung nisung 18,000 dak tema aden. Kasa küm sorkar ketdangsertemi Khristan 100 shi nokdanga liasü.
Tanga linüktemi Chinese nunger tamangba yimsü masüba tesayubatem ajanga linük nung tera ayangtsü meranger ta China nung Communist Party-i tsübua bilemba ajanga China nunger Khristan tem tamangba dak sendakba sentong nung madentsü nokdanger.
Sangküm February nung China nung Regulations on Religious Affairs meyipa reprangshimtsü lir. Iba ya theological training agitsü atema China nunger bendangleni meyoktsü atema tongti süa reprangshimtsü.