Christian Literature Ministry Yamai Tongtibang No!!

–  Sentirenba, Kohima.

Alima nung Tsüngremer wadang (ministry) ta ajaba ya tapu balala aika lir. Item rongnung asenoki aiben kanga süoki yia mebilemaka Tsüngremibo ngua alitsü südi ta bilemba rongnung Christian Literature Ministry ya ka asütsü ta amanger.
Ni mapangshia CLM nung inyaker kaket amala yoka senzüba ngua parnok nükjidong aser inyakyim asüngdang nung yamai langzü, “Iba Ministry ya 2008 küm tenzük, tanü asüng osang kaket nung kaket, cassette, ken kaket, Laishiba tasen adokbatem angur. Tanü lima kanga mazüngi aliba ajanga pei ket nung sen liaka dokani talii aotsü mapang mangur, anungji item nüburtem ketji tonga bener otsür.”
Ministry balala nung inyakertem arogo mesüra kijai itasen agütsüba asenoki angur, saka iba ministry yabo peisasa meranga inyaka tebok mesüa alir, shingaia itasen magütsür, nisungtem nungi donation meimlar, mesüra kangshia yoka mejajar, oda temulungeri alir.
Asen nisungi yangluba chiyungtsü, kaket, cassette amala yoka jajaba nungi commission koba angutsü tim ibaji agir, iba ajanga asen liso nisungtem shirnoki kaket zülur, ken tena cassette adoker, mesüra chiyungtsü tilateri yanglur parnok tebilemtsü tera tongzüktsüa onoki akokba tashi yoka senzür.” ta shia liasü.
Kodangsa item ministry nung inyakertem kaket, osettsüset, chiyungtsü amala yoka arudir aseni pelashishia agizüka jembitsü aser malinüra odia dang ‘kecha malili’ ta ashitsüji asen temeten lir. Osettsüset yoka senzürtem arudang nisung karibo malinür sürnung koda mesüi aliba ngua aruogo, tangar tapu aika aliang ta arutsü akok, saka aseni alinüra alitsü, malinüra malitsü aji asen temeten, asenok ajaki aji metettsü kanga tongtibang. Nisung karibo malinür sürnung ‘malili’ ta meshitetba agi ‘tang sen mali taruba mapang nung arung’ ta shir yoker, item nisungtemji temulung lema tanaben arudang tsükchir tsüngdang jenshia senzür amai atsükshishia senzüba ngua aruogo, itemji asen mashi memetetba den nisung makümba ajanga lir ta angatetdi.
Tanü Nagalimai Christian Literature Ministry ama peisasa meranga inyaker chiyungtsü bilemer lanurtem jenti akanger, item rongnung ne shilema kechi asütsü ?

Tiala Imchen-i züluba Aolima Nüktzü kaket ya ni jangratema züngogo. Ibai ajanga kü molung ajungmeso nung kanga pelar.
‘Ao lima nüktzü’ kaket ya English agi meyiper tangar kin-ia züngdaktsü nung asen tsürabur Naga yimten temeten tali metettsü. Iba ya yimtenren nung nokdang tajung ka asütsü.
Tanü lanurtemi film yanglua alima dang sayu nung tamshitsü otsü ka asütsü.
Talisa Aor lokti ajaki iba kaket ya alia ayutsü kanga dang ajungshir.
Kaket zülur nem tenüngsang aser akhüm tulu agütsür Tsüngremi nü sempet tali tajungba nung moajangma.

— Mr. B. Imsulemba Ao, Sabangya Compound