CHSS nung Inter-School sobaliba tsüngsang tetoktepba sentong agi

Dimapur, September 16 (TYO): Christian Higher Secondary School, Dimapur küm 50 ajungba benjungmong tenzükba dak sendakba nung September 16, 2017 nü school ground nung Inter-School Cultural Dance Competition ka ayongzüka agiogo.
Iba sentong nung school 12-i “Colours of India” nung Bhangra, Nepali, Bihu, Zeliang, Ao aser Phom sobaliba tsüngsangtem ajanga shilem agi.
Red Cross Society, Dimapur Chairman, Chandu Agarwal iba sentong nung tongti tesemdanger liasü, aser iba sentong nung jembidang pai, “Tsüngsangba ya tanela indang miim oshi ka lir, koba ajanga nisung kati jenjang yanglur, mesüra jenjang samar,” ta metetdaktsü.
Paisa, tsüngsangba ajanga asenok dang nisung ka tajungba küma alitsü sayur, ta ashi.
Paisa shilem agirtem ajungshia, tasa balala ajanga tsüngsangertem ajak nüngtugu makümer, saka tejangraba tanela alirtem nüngtugu akumer, ta ashi.
Sobaliba tsüngsang tetoktepba nung tetendangertemji- Dr. H.Y. Chishi (Director, Indigenuous Cultural Society), Oliver (Programme Officer, NEZCC) aser Tiakumzuk Aier (Director, Dreamz Unlimited) nunger liasü.
Iba tetoktepba nung Bhangra tsüngsang ajanga shilem agir- Pilgrim Higher Secondary School-i mezüngbuba jenjang nung takok ngua senpet 8000 agizük aser Dimapur Mission Higher Secondary School-i tanabuba jenjang nung takok ngua senpet 5000 agizüük.
Best Costume sempetji Holy Cross Higher Secondary School-i ngua senpet 3000 agizüka liasü.
Iba sentong nung CHSS Supervisor, Jose V.A-i lokti pela agizük, aser Vice Principal, Patricia Zhimomi-i tepela anküp o jembia liasü.
Iba sentong ya Keneichütuoü Yeptho aser Inovi Awomi na lenisüba nung agia liasü.