Clean Election nung putupur auction

~ P. Renthy Jamir.

Putu pur tatar- Küm meyirijang ka shi süia ogo, Aor Chungliyimti alidang küboklungbang tongpang koker tang nungibo putu menden küm semer atema alangtsü ta latet. Anungji küm 30 ochishia tarak maket yimsü asütsü longmi sabangi tur nangzüktepa tata menden atsünger. Iba melena tanübo laishiba amshia kuli süa atsünger. Ano auction ajaki metetba, oset ka shibai jenjang teimba agütsüdir ta yoktepba dang ajar. Akhi mapang putu yimsüsür yimer dang tuluba alu yimer meranga züsen, yim aener bendang ter mesü. Yim ammang atsüng lendong mapang nung yim lanur yimnüker chiyungtsü chipo ana asem suror shi makang sünga sar chiyungdaktsü, yimaker arura, ano yimer tongpangi aitsüsa kümra tazüngpur tama sür yim tongpangi aitsü.
Tanu putupur jenjang reprangdangra, putu sentsü nüloker azümasen tetsüdi teimba. MLA minister tulur dang makikojia meshimetsütsü maker. Yi marok sülen anishir teimba, yim aiener ka khen chiyungdaktsüra yim saru nung pezüpungu mesüba züngoka ayur. Election arutsü küm ana lia pokpoi mesangjang amentsü yongyar ama rokzüa atateper putupur ta tatar ta MOATSU NASHI sentak ataker ama, nüktapangtatsür jenjang agia memeyong shishimenshi ama, bazar nung 2nd Hand süoshi lilemerang mesüka auction süteper. Aiatai koda asütsü. Iba lima nung ajaki amshiba oset rongnung tilatiba cell phone ka jenjang joko iphone-x sen 1,29,998 agi aliteper. Ano tajungba falcon supernova pink diamond IPhone plus yabo US dollar million 110 agi ayoker. Aji dang masü asenok menüngdakba noksa artwork Leonadoi yangluba salvator mundi tawa 16-11-17 anogo nung dollar million 450.3 agi auction asüba asenoki nguogo.
Süra küm 30 yimsü asütsü anogo semer tashi taküm meshiteta anemponga shilang alangba putupur ka jenjang ya yamai ila no ta bilemer. Election air candidatetem dang sentak ataker AUCTION asüba tazüngpur ka sen meyi semer, tom pur ka jenjang meyi metsü ano sen magira NAP mapa post ka yong ayoktsü. Talak tasong jamija sen meyi ter ano karbo tajemba agia aliteter ta candidate-temi ashir. Yimdak tetsür tanur dang taaktsüka. Süra iba atakatem ya yimdak nungi koma meshiteta aritoktsü. Alemlibo putirtemi yamala atakatem ya yimdong süa ola tulu ayima menameya sarur ta sarua jajar yim amongdang oa atakatemersa entok. Tanübo yamala putir maparen to mamshir asünung, iba melena yamai inyak nunga jungla ta nubur aika nungi tebilemba bendendanger.
1. Putupur auction süa yokteper tashi (Kechiyong karbo mayokera lir) tareni line küma nokdaktsü. Yim lanuri merang taklemtsü agi repa azüktsüla.
2. Kijungtsürtemi süpeti ajaloktsütsü
3. Bokmatemi süngkong ali atashia atemtsü.
4. Studenttemi PUTUPUR AUCTION omen nung ajemdaker sangro zulutepa toktepba sentong alitsula. Yamala mapatong aika ano lir. oda tanur noyanomak aser yimdong kazür nungi pojen tashi shilem karbosa agitettsüsa sentongji yanglutsüla (küm 30 nung terokben mayoktsü atema) yamaji ka inyaka putupur auction ya menokdangtetra, CLEAN ELECTION ta ayimtenba ya tzürong nung ken tentok dang asütsü. Alimabo telungisa alutsü, oda oda yim aika nung süngo meitsü. Aser nübur AIATAI TIA-I aitsü. Anungji clean election nung putu pur auction ya tama yim shia benteta ayutsü mapang tongogo ta bilemer.