CM den mensem

Taoba Honibar anepdang Kohima nung Chief minister T.R.Zeliang-i par alidak official kidang Naga nunger lanurtem rongnung pa den face book nung tebilemba lemsateper parnok terka jaoka süngo jema sensaksem mapang ka agitsü tenzükba sentongji junger ta bilemer. Iba jagi pai Nagaland tajungba küma yanglutsü asoshi senso ajak nungi shisatsü aginür ta angatetter. Atangji, tanü asüng balaka nübortemi government dak tajung kecha mereprangtetter, kechiyong government nung alirtemi nübortem mulung asütsüsa terenlok mapa meinyaker. Ajisüaka, tang Chief ministeri lanurtem jaoka parnok dang nungi state tajungba küma yanglutsü asoshi shisatsü meshiba tetezüji parnokia temulung nungbo tajung inyaktsü bilemdagi ta sayur. Asen lima nung yimten tebilemtsü den ano lanurtem ajak government mapai aitsü atema dang züngdaktsü amai tangatetba tai ka tsürabur aser tesayurtemi agüja alinungji, tazünger aser mazünger lanurtem ajak government mapa dak dang rangloker tanga mapabo teinyaktsü maka amai mapa mangu kazütepba tebilemtsü agi Nagaland kangshiba mapangji tang ya lir. Item tebilemtsü akoktsübaji yimsüsürtemi tang amaji lanurtem den shisalemsateptsübaji tongtibang asütsü. Tanü putu nung balaka, tanurtem school-i maodangyongi zülutsü aser azüngtsü metetadoker aser tera tain kümerbo joko interenet aser tv ajanga alima nung kechisa ataloker, kechi nüngdaker aser koma inyaker, item ajakji metetadoker asünungji, tanurtem aika class takdang nung tesayurtem dang nungi temetetba aser tajungba alir. Iba amaji tanübo kidang mena yur alima ajak sema shisatsü bushia senzüba putu asünungji, taintem dang nungibo lanurtem dakang shisatsü tuluba alir. Iba jagi tanü tensa nungbo lanurtem ya tarutsü lenirtem dang masü saka tanüa parnok lenir lir. Ibaji angateta lanurtem dak aliba tashitemetet aser sempet bendena asen lima yanglutsü merangtsübaji yimsüsür aser ketdangsertemi kanga süoki ia inyaktsüla. Atangji, lanurtemi tanü asen lima raksaa aliba ya yangluner, parnok kechi mapa nung südirsüaka, asenok tsüraburtem ama masü, ochishia aser nendaka inyakner. Iba tejangraba aser tangatetba jagi asen lima nung temelenshi tajung ka bener arutsü ana nung lir. Ajisüaka, iba temelenshiji timi arutsü asü mesüra nübortemi tashiyim amshia longkak aita bener arutsüar, ibajibo yimsüsür aser ketdangsertem dak tuluka keta lir.  Tanü yimsüsür aser tsüraburtemi inyaktsüba mapa tulutibaji lanurtemi temulung alemtsüsa yimten, lokti aser kibong nung ketdang asütsüla. Chief minister-i süngo molua yur jaokba amaji lanurtem jaokabo jembi aser tesem balala nung mapang mapang shia ochishia alitsü nüngdakba tayongzükba o tulu agütsü, ajisüaka asen state nung asenoki anir ochimashi mapa inyakra, mapa meinyaki sen lemsaa achitsü bilemra, mapabo metenzük saka percentage-bo meshir ta süra, temetetbabo kecha mali saka ita sen achitsü atema tetendanga metendang government mapa nung nisung zünger mezüngma aniokra, iba jagi lanurtem jaoka shisalemsatepbaji temenünütsüka amajok akümtsü. Aiben asenoki yimten nung tenzüktsü maongka anguba ya yimten tashi amshia asen agitsü rongsen bendentsü mapang tajung angu amai bilemer. Iba jagi government li ajak rakzüka agimar, tetsür tanur, tantsür tamburtem aser yimtsüng aser town nung alirtem asoshi lemzüktsüba senotsü miimzüka chitsür. Itemji ajaki ajaklen jembir, anungji lanurtemi kanga junga meteta lir. Item ochimashi mapatem jagi lanurtem molungjang memenendaktsütsüla aser parnokji mejashidaktsütsüla. Lanurtembo jaoka parnok nungi shisatsübo agi saka parnok den pilali parnoki ashiba nüngdaktem ajak amar, ano akhi ama pei agitsü rongsen dang bushia inyakra, ibajibo lanurtem mezüngmeshiba aser tarutsü lanu putu ashioktsüba mapa ka asütsü. Iba amaji mesüi tang nungibo yimten yimsüsürtemi pei asoshi masü saka nübortem asoshi rongsen bushia Nagaland nung lanur shinga kazütsü mapang mengui mazüngi inyakba agi, Nagaland ya topur tajung takar lima kümdaktsütsüsa inyaktsüla. Yimsüsürtemi lanurtem aser taintem den mapang shia shisalemsatepa ochishia inyakba putu ka tenzüktsübaji kanga nüngdaka kümogo.