Country kentener ‘gentle giant,’ Don Williams süogo

September 09, 2017 : Country music tetsüti, Don Williams mapang tatsüka shiranger September 08, 2017 nü süogo. Pa arishi küm 78 liasü.
Williams ya May 27, 1939 nü Floydada, Texas, nung aso aser iba anasa aliba Portland tesem nung intet.
Nisung ajaki kanga jangja meteta aliba ken zülur aser kentener, Williams dang country music indang “Gentle Giant,” ta tenüng jalokja lir aser küm 60 tashi pa takok ma nung aru.
Floydada, Texas nung asosang, Williams-i ken züluba mapa tenzüktsü asoshi 1960s tatembanglen Nashville-i apusoa ao, ajisüaka kentenba nunga kanga nüngtugu aküm, aser pa ken 17 tashi country charts nung #1 hits aküm. 1970s mapang, pop music mainstream-i mezüngbuba aisangji Williams liasü. Pa alima nung country artists tulutiba rongnung ka aküm aser alimai pa ken “Tulsa Time” atema pa tenüng kanga asanger, koba Eric Clapton atemaka top-30 hit aküm.
Williams-i tatemsa 2016 küm perform asü aser iba sülen kentenba nungi anisüngzük.
Pai, “Kü korang semzüka idaka yur kidang ajem ajema amungtsü mapang tongogo. Kü fan, medemertem aser ozü kinungertemi ni maneni meima nungitba atema ni kanga pelar,” ta pa anisüngzüktsü sangdongba mapang ashi.
Williams asüba osang angashia social media ajanga pa indang nüngtugu fans, Charlie Daniels, Travis Tritt, Ricky Scaggs aser ano tangar aikati akümtsübu agüja asükhu lemsatepba osang lemsatepogo.