DC aser VC tem dang Swachhta Hi Sewa inyaktsü asüngdanger

Dimapur, September 20 (TYO): Nagaland Angh atema Principal Secretary, Piyush Goyal, IAS-i district 11 nung Deputy Commissioner tem aser Nagaland University, St. Joseph University, Global Open University o ICFAI University nung Vice Chancellor tem dang Swachhta Hi Sewa (SHS) campaign indang osang metetdaktsüogo.
Swachhta Hi Sewa (SHS) ya merükmejuba indang sentong lir aser September 15, 2017 nü India Tir-i tenzüktsü.
Nagaland Angh, PB Acharya-i parnok nem pei pei telongtet nung SHS campaign inyaktsü aser iba osang den noksatem agütsüdaktsünür, ta Principal Secretary-i Deputy Commissioner aser Vice Chancellor tem dangi züluba shidi nung shia lir.
Taoba mapang Angh Acharya-isa Chief Minister dena Nagaland Legislative Assembly nung züngsem 60 prongla aser Members of Parliament ana dang SHS campaign nung shilem agitsü aser oei state constituency tem nung mapa inyakba den noksatem agütsütsü mepishia metetdakja liasü.
SHS campaign ya October 2, 2017 tashi inyaktsü aser iba mapang linük nung merükmeju indang temetettsü sangdongtsü.