Dec 10 nü Boney M concert atema renemshidar

Kohima, December 7 (TYO): December 10 nü “Christmas with Boney M” international show atema Hockey ground, IG stadium, Kohima nung kanga mazüngi terenemshiba agidar, aser taküm küm atemabo Kohima nung kentenba sentong iba kija ya asütsü.
December ita atongba den külemi Nagaland kinük ajunga nung Boney M Christmas ken tem atemer aser takümbo Kohima nung parnoki live atenba angutsü. Parnok telok ya founding member Liz Mitchell-i anir Toni Ashcroft (shibai Bobby Farrell asüba sülen 2010 küm melen), Valerie Margaret Jacinth aser Vanessa Paulette, shirnok la den 80’s tatemlen nungi tanü tashi Boney M featuring Liz Mitchell ta sür original record producer Frank Farian kübok shilem agidar. Parnoki parnok indang nüngtugu ken Rivers of Babylon, Mary’s Boy Child, Daddy Cool, Sunny, Ma Baker, Belfast, Rasputin, Brown Girl In The Ring, nunger amala tena senzür.
Par telok ya Kohima, December 9 nü atongtsü aser night bazaar akaba mapang nung parnok kohima jilai aitsü imlar, aji asünungdang fan temi parnok angutsü aser pelashishia agizüktettsü.
Iba sentong ya Christmas family show ka asütsü imlar, aser sentong nung adenertem tantsür tambur, lanur aser tanur ta meyoktepa asütsü imlar.
Maneni tanga state nungi fans tema Kohima-i arutsü imlar kechiyong highly billed show Delhi nung 2015 küm athiba sülen Boney M pur mapang talangka lir tang mezüngbuba India nung shilem agitsüba lir.
Iba sentong reprangtsüba atema kicha atema general ticket sen 1000 aser parking facility o light refreshments dena aginürtem atema Gold Pass sen 10,000 asütsü. Iba ticket bener nisung ana tashi itettsü.
Küm 10 nungi tekübok tanurtem pei tsürapur den angati agi dang idaktsütsü, ta sentong ayonger Nagaland Outdoor Club puri tanü sangdong ka ajanga metetdaktsü.
Maneni iba show reprangtsüba atema ticket tem ken tenba tesem dak alaka district ajunga nung outlets balala nung angutsü.
Kentenba sentong aonung traffic kanga junga senzüdaktsütsüba atema Whoka len nungi aruba garitem ajak aser High School len nungi IG stadium-i aoba garitem ajak New Secretariat tsütsülen High Court junction leni divert sütsütsü, ta sentong ayongertemi metetdaktsü.