Delhi nung Naga tsür ka kilem kolak nungi tsüka asü

New Delhi, September 27 (Agencies): Deobar nü Delhi nung Nagaland nungi arishi küm 27 tetsür ka aser Manipur nunger tebur ana chiajemer kilem kolak nungi tsükba lendong nung tetsürlaji tsükset aser tebur anaji yirua lir, ta police-i ashi.
Police-i ashiba agi, iba tatalokbaji Delhi, Krishna Nagar tesem nung atalok.
Par asempronglaji BDTLEDU telecom company nung inyaker, aser kasa office ji parnok tsükba ki tamentep pezübuba nung lir.
Osangbenertem den jembidang South District Police Deputy Commissioner, Prem Nath-i “Tanep 3:50 ako meta PCR (Police Control Room) dang telephone ajanga Krishna Nagar nung nisung asem tasü-taküm na nung lir ta metetdaktsü. Police telok iba tesem atongdang tetsür ka aser tebur ana kilem nungi tsüka lia angu,” ta ashi.
“Tetsürlaji iba tesem nungjisa sür liasü, tebur anaji kanga mejungi yirur liasü,” ta police ketdangserisa ashi.
Tetsürlaji Nagaland nungi Lovili liasü ta jangjaogo, aser tebur anaji Manipur nungi Robert aser Jacob na lir, tenapronglaji arishi küm 24 lir.
Iba tatalokba dak sentakba nungsa police-i, par asemji office mapa ammang shilem nung liasü, aser aonung tesü chiyungba sülen parnok yi jemtep. Iba sülen 3:00 ako meta parnok ano kilem jagi tua yi ajem aser parnok tsük südi ta temulung melemi bilemer, ta ashi.
Tebur anaji AIIMS nung yaridar aser tasümang post mortem agiba sülen Naga lenirtem aser NGOs dang tetsürla tasümangji agizüki arung ta metetdaktsüogo, ta paisa ashi.
AIIMS otongdar Amit Gupta-i, par asemprong tanep 4:30 ako meta AIIMS-i anir aru, ta ashi.
“Tetsürlajibo bener arudangyongi sür liasü ta sangdong aser tangar anaji trauma centre ICU nung yaridar,” ta otongdari ashi.
Paisa ashiba agi, Robert ji telung nung zübo keta yiru saka Jacob jibo teret dang kar kosük.
Prem Nath-isa, “Iba ya memeteti atalokba lendong ama reprangteter. Ajisüaka onoki Section 304 A aser 337 kübok ken o benokogo. Bushisüngdang maneni agidar,” ta ashi.