Dengue agi shirangdang mamazü tou ajanga teyari agütsür

Mamazüdong tou nungi agizükba tzüji temang atema tajung ta scientific papers aikati kuli agütsür. Temang anepaluaren bushirtem rongnung mamazü tou nungi agizükba tzü ajanga tajangzük agütsüba indang kuli agütsürtem rongnung mezüngpurji University of Florida, Research Center nungi Dr Nam Dang liasü. Pai bushitetba osang nung mamazü tou nungi agizükba tzü ajanga cancer den rarateter, temang atema non toxic aser nisung ka immunity tashi itdaktsüteter.
Mamazü tou nungi agizükba tzü ajanga malaria aser cancer ajunger ta bushiteta aodang Sri Lanka nungi Dr Sanath Hettige-i mamazü tou nungi agizükba tzü ajanga dengue tashidak anepaluteter ta bushitet.
2008 küm Sri Lankan Journal of Family Physicians nung Dr Sanath Hettige-i bushitetba osang adok.
Mamazü tou nung chymopapin aser papain amala enzymes keta lir aser itemji ajanga platelet count yarir, temesen mapa inyakdaktsür aser dengue ajanga temesen raksatsüba jungdaktsür. Itemji ajanga dengue agi shirangertem tajungba kümdaktsür ta Dr Sanath Hettige-i bushitet.
Dr Hettige-isa ashiba agi, mamazü atangba dong nungi tou lanutem amshitsüla aser talisa India nung kanga bulua anguba Red Lady papaya plant ajanga teyari tuluba agütsür.
Süngo tou tashi mesüra kanga lanutem mamshitsüla aser touji tamasa tzü temerük nung kanga junga shidoker menüngsatsüla. Iba nung tzü, metsü mesüra shini nunger ama kecha meinoktsüla. Tou menüngsaba sülen idak nungjagi tzü kanga junga ajetzüker anogo nung anaben ajemtsüla. Mamazü tou nungi agizükba tzü nung kecha menioki dang tesa ajemtsüla aser tain nem 10 ml (anogo nung anaben mesüra ghonda 8 lir külen) aser tanur nem 5 ml (anogo nung anaben) jemdaktsütsüla.
Dengue agi shiranger ta putetba mesüra yimya ajitetba sülen tekaratiba nung mamazü tou nungi agizükba tzü jemdaktsütsüla. (Source -Internet)