Dera Hq. nung nisung 600 indang teret rema lir

Sirsa (Haryana), September 20 (Agencies): Sirsa nung aliba Dera Saccha Sauda headquarters telung nung nisung 600 indang teret rema lir ta osang ka ajanga ashi.
Special Investigation Team telung osang ka ajanga ashiba agi, Dera campus nung teret aika rema lir, aser iba tema nungji süngolio/süngdong tema lir, aser karbo süngdong tulu kümogo.
Osangbener den jembidang taoba mapang Haryana nungi journalist, Ramanand Tatia-i, Dera campus ji ali tua bushisüngdangra nisung teret aika angutsü, aser ibaji ajanga nisung 500 jungnüa samaba kuli angutsü, ta metetdaktsü.
Tatia-isa, Dera tongti, Ram Rahim anema nisung kari danga nokdakra, parnokji tepseter meima campus telung nungji rema toktsü, ta ashi.
Paisa, National media-i kulisüa repranga lia ali tua bushisüngdangtsüla, ta ashi.
Küm 15 tejaklen Ram Rahim-i pa sülen anidaker tetsür chanu ana tashiyim amshia raksatsüba ken o nung tawa CBI special court kati pa aija küm 20 tepoukdak ayutsü atema obendang agüja liasü.
Court-i Ram Rahim Singh aitsüba sülen Haryana, Punjab aser Delhi nung pa sülen anidakertemi rara tulu adokdakja nisung jenti asü aser aika yirua liasü.
Pa aitsüba sülen Dera headquarters telung nung bushisüngdang tenzüka liasü, aser tang tashi nung bushitetba agi pai pa tamarener Chuba ka ama aliba bushitetogo.
Pa aitsüba sülen pai par jala ama agiba, Honeypreet Insan jenshia senzüdar, aser tang India-Nepal arrtsülen Maharajganj aser temeket district tem nung police-i la tebushidak lir.