Dilong ward nung ‘mass declaration’ sentong agi

Mokokchung, Tsüklai 15 (TYO): Mokokchung town kübok aliba Dilong Ward Yimden-i Yangtepnü (Brihostibarnü) 26 Aonglenden Assembly Constituency nungi election-i aitsü candidate-tem atema “mass declaration” ta sür sentong ka Dilong community hall nung ayongzüka agiogo.
26 Aonglenden A/C nungi taküm candidate ana; Naga People’s Front (NPF) nungi Toshipokba aser Nationalist Democratic Progressive Party (NDPP) nungi Imtikümzük na tokteptsü nomination file süogo. Candidate anaprongla arua tenati mapang tatsütsü agia election-i aiba nükjidong den adoker inyaktsü mangdang balala lemsatep. Iba ama sentong ayongba asoshi candidate anapronglai Dilong ward yimden nem tenüngsang agütsü. Candidate anaprongla ya Ungma yimtiba nungi dang lir.
Dilong nung ‘Mass Declaration’ sentong agitsüba ya Oct 29, 2016 nü Dilong Ward Yimden aser lokti senden-i lemtetba bangzüng dak ajemdaker ayongba ka lir, ibai tongtibangsa candidate-tem asoshi nübu, rongsen kümzüktsüba den ano parnok sempet/shisatsü aser nübu tendangtsü nükjidong yur iba ya akatsü lemtetba lir, ta Dilong Ward Yimden chairman I. Tia Soyah-i metetdaktsü.
Election mapang candidate naprongla nem Dilong ward nung nübu ayimtsü kishi sadema lapoktsüogo aser camp asem-sem (men-women-youth) dang mesemtsü melaogo, aji saka, candidate shingaia Dilong ward nung temesepba chiyungtsü bener arua nüburtem mesüzüktsü memerangtsüla mesüra timtem magütsütsüla mesüra Dilong nung vote malirtem polling mapang arutsü makok, aser shiri iba nungji aibelendir tapet merenshitsü, ta Tia Soyah-isa tekümdangtsü o ka metetdaktsü.
Dilong ward nung ya polling station ana (2) lir aser voter ajak agi 1700 shi lir. 26 Aonglenden A/C kübok yim asem lir; Ungma, Settsü aser Küpza, aser town ward kübok Dilong, Arkong, Marepkong aser Sangtemla ward nungertem lir.