Dimapur Ao Lanur Telongjem-i kenten sentong ayonger

Dimapur Ao Lanur Telongjem (DALT) ketdangpurtem, organising committee züngsemtem aser kentenertemi agiba noksa ka angur. (Dimapur, October 25)

Dimapur, October 25 (TYO): Dimapur nung Ao Senden Reju ki yanglutsü nüngtem nung Dimapur Ao Lanur Telongjem (DALT)-i November 4, 2017 nü DDSC stadium nung kenten sentong ka ayonga agitsü.
Iba sentong ya “Celebration of our harmony” omen nung ajemdaker agitsü aser Aor kentener 11 aser Dreamz Unlimited nungertemi shilem agitsü, ta organising secretary, Moanungsang-i tanü osangbenertem dang ashi.
Sentong nung shilem agitsüpurtemji Anungba Sanglir, Tzusa Imchen, Sashi & Aienla, Mangyang Imchen, Wonder Waves, Tiameren Aier, Wabong Ozukum, Waluniba, Toshimeren, Moajungla aser Marjo Kichu nungertem lir.
Sentong nung tenüng balaka jateta jaokertemji Temjen Toy (IAS), Additional Chief Secretary, Aolemba, Additional Development Commissioner aser A Chuba Ozukum, Senior Admn. Officer, department of Justice & Law nungertem asütsü aser parnokia tajungshi o tem jembitsü.
Dimapur nung Ao Senden Reju hall ji sen crore 1 endokba yanglur aser iba nung shilem 60 dang tembangogo. Iba ki yangluzükba sülen Aor dang masü saka Dimapur nung alirtem ajak ajangzüktsü, ta DALT tir, Longri-ia osangbenertem jembidang ashi.
Iba kenten sentong atema tickek jenjangtem telemsaji yamai alitsü. Rs. 2000 (Donors admit four), Rs. 500 (admit two) aser kaketshirtem atema Rs 500.
Sentongji nikongdang 6:00 ako nung tenzüktsü aser kishi 5:00 ako nung lapoktsü. Kenten sentong ayongertemi sentong tagidak nung angati refreshment agütsütsü.