Dimapur DC & DEO-i Dmr AC ajak nungi candidates den senden amen

Tsüklai 09, 2018 nü Dimapur DC conference hall nung Deputy Commissioner aser District Election officer Dimapur, Sushil Kumar Patel (IAS)-i Dimapur nung Assembly Constituency ponguprongla nungi yimtenren party tem, candidate tem, General Observers, Returning officers aser MCMC züngsemtem den senden amenba mapang election atema tenangzükba agiba noksa nung angur.

Dimapur, Tsüklai (February) 09 (TYO): 13buba Nagaland Legislative Assembly election dak sendakba nung Tsüklai 09, 2018 nü Dimapur DC conference hall nung Deputy Commissioner aser District Election officer Dimapur, Sushil Kumar Patel (IAS)-i Dimapur nung Assembly Constituency ponguprongla nungi yimtenren party tem, candidate tem, General Observers, Returning officers aser MCMC züngsemtem den senden ka mena liasü.
Iba senden nung Sushil Kumar-i züngsemtem dang Nagaland nung taruba Assembly election dak sendakba nung Expenditure indang tongmelang agi metetdaktsü aser candidates den party balala nungi züngsemtemi merajemba metetdakja liasü.
Paisa parnok dang MCMC teinyaktsü shilem metetdaktsüba den külemi Tsüklai 18-19 anogotem nung Dimapur nung aliba assembly constituency ajak atema EVM renemtsü, ta metetdaktsü.
Senden nung Commissioner Police, Dimapur, Limasunep-i candidates dak sendakba security aser tzüzüng-ozüng onüktem indang metetdaktsü.
Candidates ajaki armed body guards anana angutsü temsüa lir, ta ashiba den külemi pai candidate kar danga amokmerena lira house guards-a agutsütsü, ta metetdaktsü.
CP Dimapur-isa anasatiba police station mesüra Deputy Commissioner’s office nung license aliba prangpongtem agutsütsütsü asoshi metetdakja liasü.
Iba senden nung Dimapur district kübok AC balala nung General Observers aser Police Observers dena liasü.
Parnoki candidate tem dang ECI telatetbatem nung aliba ama election timi agitsü atema inyaktsü mepishia metetdaktsü.
Returning officers ajak tenüng nung Sara S. Jamir-i candidates aser representatives ajak dang lokti senden akatsü, campaigns aser vehicle permit atema temelaba meshitsü asoshi telatetbatem junga azüngtsüla, aser timtem kar danga lira peiepei tesem nung ROs nem tezüluba nung agujang mesüra online ajanga metetdakjang, ta shisem.
Senden tembangba sülen Dimapur DC aser DEO-i ketdangsüa candidates, yimtenren party tem, Observers aser senden nung adenertemi ajaki clean election atema tenangzükba agia liasü.
Tenangzükba:
NAGALAND ASSEMBLY ELECTION 2018 MAPANG NUNG NI ITEM YA INYAKTSü NANGZüKER-
* Ni kechi südir süaka kü vote sen yong mayoktsü.
* Ni rara kecha nunga shilem magitsü.
* Ni kin mesüra jenjang kecha mapir candidate tajungtiba nem kü vote agutsütsü.
* Election nung tim mesüi inyakba mesüra election osang raksatsüsa inyakba mapatem ni jungkai adoktsütsü.
* Ni sübokrem mesüra voters amokmerenba nung shilem magitsü.
* Ni Model Code of Conduct nung aliba telatetbatem benshitsü.
* Iba election ya junga tesünep nung agitettsü atema kü tajungtiba agi inyaktsü.
* Taruba election atema ni iba osang ya ni meteta aliba voters den lemsateptsü.
* Ni nangzükba inyaktettsü atema ni Tsüngrem dang teyari meshia sarasademtsü.
Ozü linük aser nüburtem meimba ajanga ni iba tenangzükba ya kü sasa melungteta agir.