Dimapur nung BLOs atema training agi

Dimapur, Tsüklai 17 (TYO): Tanü conference hall, Commissioner of Taxes, Dimapur nung taruba assembly election atema Dimapur district nung BLOs asoshi training den orientation programme ka repsema agiogo.
Iba senden nung Dimapur DC & DEO, Sushil Kumar Patel, IAS-i, kanga tongtibangtiba maparenji voters slips alemba lir, ta shia BLOs nem tesayuba agutsü.
DC-isa, malemba voter slips (malirtem, tesem melenshirtem aser asürtem indang) peipei Returning officers nem meyipa agutsütsüla, ta metetdaktsü.
DC-isa BLOs dang, vote agutsüdang tetsür aser tebur na tarensen balala nung nokdakdaktsütsüla aser tenüng menük malitsü (remark tamajung) atema polling mapang nung mepetmesü kecha madokdaktsütsüla, kechiyong General Observer-i mashie mapang nung semdangtsüa akok, ta ashi.
Assistant Election Officer, Dimapur, Rolland Merry-ia, EPIC ji tatongtsüpur ket shidak tongtsütsüla aser council/ward chairman ket nung meyutsütsüla, ta ashiba den külemi BLOs dang EPIC agutsüdang nisungba nemji EPIC Register nung sign südaktsütsü metetdaktsü.
Senden nungsa BLOs nem training voters slip lemtsü, aser ibaji asüng nungi tenzüka nüburtem nem lemtsütsü.