Dimapur nung tsümar shishilembar ka dak akah

Dimapur, August 19 (TYO): August 19, 2015 anjongmeshi mapang, 12:00 ako meta mejangjaba nisung kati Ashok Jain’er jabaso Aman Jain dokan nung lia injang kahloktsü, ta Addl. Dy. Commissioner of Police/PRO, Dimapur-i Bodhbar nü sangdong ka nung metetdaktsü.
Injang agi yirur alisang ya GS Road, Dimapur nung aliba Sai Electricals dokan kibur adianu lir. Aman tapubang achiji tsünglanglen injang ka agi yiruba sülen medical teyari atema ilonga anir ao.
Iba tatalokba tesem nungjagi police-i 7.65 calibre injang terep ka nguogo.
Iba tatalokba atema shinga-ia police nem ken o kecha agüja mali, saka iba tatalokba ya sen akhangba dak sentaka ali südi ta mulung malemer.
Iba dak sentakba nung police-i bushisüngdang tenzükogo aser East Police Station nung ken o ka benokogo aser aibelenerji aputsü asoshi tang tebushitak lir, ta kasa sangdong ajangasa metetdaktsü.
Shishilembar ka tepsettsü merangba aitsür: DCCI
Ano tanga sangdong ka ajanga Dimapur Chamber of Commerce & Industry (DCCI) Tir, Hokivi Chishi-i, August 3, 2015 nü Yimjung Tenangzüktep ajanga state nung tesünep aser teimla aliba mapang ka nung lokti anemertemi tensa raksadaktsütsü aser lokti nung tetsübu aitdaktsütsü asoshi inyakba ya tesasatsüka, ta aitsüogo.
Bodhbar nü ano Dimapur nung shishilembar ka taküm agitsü merangba atema DCCI kanga jashir, ta DCCI tirisa sangdong nung shia lir.
Sangwa lia item ama ozüng alema atalokbatem ajanga ozüng alema aibelenertemi Dimapur nung junga amenteter aliba Police force junga mezüngshiba sayur.
Item ama aibelen mapa maneni atalokba ajanga shishilembartem kanga kodamasüba jenjang kati iogo. Dimapur nung shishilembartemi joko maremzüktettsüsa tensa kati kanga kara arudagi, aser tamalen bilema aliba ama mapang telatet ka makai shishilembaba dokan ajak shibangtsü asoshi DCCI-i ayongzüktsüa akok, ta DCCI tirisa ashi.
Onoki ozüng amertem dang Bodhbar nü tatalokba nung aibelenertem tekaraba nung apuba ajanga parnoki mapa takok ngua inyakteter ta sayutsü akhanger, ta DCCI tirisa metetdaktsüogo.