DLST senden nung Aoer meraket indang jembi

Dimapur, Sept.09 (TYO): Nagaland nung Aortem ya samanirtem ta jembir aser aji shitak lir, kechiyong Naga nungertem yimten, loktiliba aser tamangba yimsü nung lendong timtem tizükteta lenmang sapoka anirtemji Aortem liasü, ta tanü Dimapur nung Langpangkong Senso Telongjem lokti senden nung “Aor meraket’ onük nung jembidang, tongti o jembir, Police Commissioner, Wb.Limasünep Jamir IPS-i metetdaktsü.
Paisa ashiba agi, Ao kin asoshi tajung kaji pei lipok otsü tejangja lir, anungji aji tanü putu nung alirtemi jangjaa metettsüla aser rongsen bushiba nung ochi ashitsüla.
Ao kin tashimait aoba olen ka lemsatepdang, Naga nunger rongnung tamalen Aor samanir süaka tanü tensa reprangdangra, Naga lima nung Aor ola ajema kümogo, anungji maparen ajak nung asentenshitsü mapang tongogo, ta paisa ashi. Naga nungertem asoshi Aortem ya teimla agütsür aser tasü itshidaktsür kin asütsüla aser Ao kini anir Nagaland nung tesadok loktiliba ka yanglutsüla, ta Wb.Limasünepisa ayongzük.
Iba kasa senden nung tajungshi o jembidang, tanü Naga lima nung ochi mejembiba wara ka agi tonga lir, shingaia ochi tasü itta mejembitetter ta Vigilance Commision nung Director & DIGP Wb.Meyioneni metetdaktsü.
Tsüngrem tenzüker sannüker aser sayutsüngirtemia ochimashirtem nümamedangteti mechioka alutsüsa kechiba ochi mejembitetter (?) ta paisa ashi.
Paisa Nagaland nung ochimashi mapatem anema nokdaktsü asoshi tayongzükba ken o ka lemsatepdang, percentage aser commission agi kibong memesütsüla aser lokti nung pei ajangzüktsü asoshi lenir akümtsü merakteptsüla, ta metetdaktsü.
Paisa Clean election maparen nung tepu sema ashidang, metemsü aser malangyonga pei yimer ta asüba tangatetba ya endoktsüla aser senso candidate meshimi temsüa alirtem shimtsüla ta metetdaktsü.
Iba sentong nungsa Diphupar ‘B’ Arogo nung sannüker Rev.Lanui tepela o jembi aser East Dimapur Ao Baptist Arogo nung sannüker Wb.Jongpongi lai zünga sarasademer sentong tenzük.
Iba sentong nung Dimapur Langpangkong Teintet Lanur rogotemi Langpangkong naklu ken tena liasü.
Dimapur nung Langpangkong Senso Telongjem ya 1968 küm tenzük aser sangküm 2018 küm Golden Jubilee amongtsü sentong renemdagi.