Dr. Shurhozelei-i jembiba ama inyaktsüla: AAP Nagaland

Dimapur, September 21 (TYO): NPF yimsüsüba kübok yimtenren lenirtemi metetsümonga tesüiba küm 15 tashi tai maket Naga nungertem aoksadakja arudar, ta tanü Aam Aadmi Party, Nagaland State Convenor, Dr. S. Amos Lkr-i sangdong ka ajanga metetdaktsü.
Kohima nung NPF (Part 1) Central office nung consultative senden nung jembidang Dr. Shurhozelie-i, “Parnoki onok kangasa ajungmesora, onoki file tem kaktettsüsa akumtsü. Neiphiu Rio aser TR Zeliang CM inyakba mapang tenati sen crore meyirjang aika indang contract maparen, teindokba jenjang kanga agi talila yanglubatem lir aser itemji yimjak nung metetdaktsütsü”, ta jembiogo.
Süra NPF party ka dang alidang party Tir inyaksang, Dr. Shurhozelei dang AAP Nagaland-i tasüngdangba kar asüngdangner. Tesüiba küm 15 tashi pa jakdang auyaba mapang nung shisa akasangi kechiba ola madoki liasü?, Naga nunger küm 15 tashi timtema arur kechiba tang ang iba ya yimjak nung metetaktsür?, ta AAP Nagaland-i ashi.
“Pai jembiba ama shidak inyakdi süra pai taoba Chief Minister aser tang Lok Sabha nung teinyakdak MP aser Tinku (Vinay Kumar Sethi) nunger anema CBI-i sen crore aika indang PDS ochimashi ken o bushisüngdangba nung amalitepa aser yaritepa inyaktsüla,” ta AAP Nagaland-i metetdaktsü.
NPF ya Naga nunger atema lir, anungji party Tir ka ama pai court balala nung Tinku Sethi anema PIL benoktsüla, kechiyong tesüiba küm 20 tashi Naga nunger tajangzüktem chitsüba nung tongti asalentongsangji Tinku lir. Dr. Shurhozelie-i aniba NPF (part-1)-i parnoki jembiba ama Naga nunger atema inyaktsüdi süra tangsa PIL benoktsüla,” ta sangdong nungsa shia lir.
“Tinku Sethi ya 1997 küm April 23 nü nisung tepsetba ken o nung dena lir, aser Guhati High Court tetuyuba kübok Nagaland Police-i pa aputsü ‘warrant’ agüja lir, ajisüaka NPF nung bangdak lenirtem den pa tesendaktep aliba ajanga tang tashi pa mapur,” ta sangdong nungsa shi lir.