EC-i Delhi nung MLA 20 anentsütsü benok

New Delhi, Aenjeti 19 (Agencies): Delhi nung Aam Aadmi Party atema osang tamajung kaji- tanü Election Commission (EC)-i AAP MLA 20-i Parliamentary Secretaries ama tajangzük aliba office abenba atema assembly nungi anentsütsü benokogo.
Osang angazükba agi, EC-i linük Tir, Ram Nath Kovind matsüngdang AAP MLA 20 anentsütsü atema benok.
Iba dak sendakba nung Election Commissioner, AK Joti-i, “Onoki Tir matsüngdang kechi benokar melemsateptsü,” ta metetdaktsü.
AAP MLA tem anentsütsü atema temepishibaji Delhi lawyer Prashant Patel-i agütsüogo. Pai ashiba agi, MLA tem jagi Parliamentary Secretaries ama office balala ajanga tajangzüktem angur.
2016 küm June ita nunga Congress Party-i Election Commission dang Delhi nung AAP MLA 21 anentsütsü atema benoka liasü.
Item MLA 21 nungi Jarnail Singh anema benokbabo agienogo, kechiyong 2017 küm February ita nung pa Punjab Assembly election nung tokteptsü atema pai Rajouri Garden nungi MLA menden tokja liasü.
Iba dak sendakba nung EC-i AAP MLA tem dang telangzüba meshiogo.
2015 küm March ita nung AAP sorkari Delhi Members of Legislative Assembly (Removal of Disqualification) Act, 1997 nung temelenshi ka benoka liasü, aser iba temelenshiji Parliamentary Secretary post nung ‘office of profit’ agientsü atema liasü.
Ajisüaka taoba linük Tir, Pranab Mukherjee-i ibaji magizük.
Ano tanga osang ka nung tanü Aam Aadmi Party (AAP)-i, Election Commission (EC)-i telangzüba agütsütsü atema MLA tem nem maongka magütsü, ta aitsü.
Tanü osangbenertem senden ka ayongzükba sülen AAP lenir, Saurabh Bhardwaj-i, “Election Commission tongti, AK Joti-i pa mapa nungi animesüngzükdang Ato kilonser Modi nem tajung ka meyiptsüner,” ta aitsü.
EC tongti, Joti tan ita 23 nü arishi küm 65 ajungtsü, aser pai EC menden toktsütsü.