ED-i Mumbai nung Nirav Modi indang kiojen mita reprang

New Delhi, Tsüklai 15 (Agencies): Punjab National Bank-i ken o ka agutsüba nung ajemdaker Yangtepnü Enforcement Directorate (ED)-i sen crore 280 nung ochimashi ken o dak sendakba nung jewellery designer, Nirav Modi indang kiojen aser show room tem mita ao.
Ketdangsertem osang ajanga ashiba agi, ED ketdangsertemi tanep yakta Modi’er indang kiojen ter shi mita ao. Mumbai nung ED-i mita aobatem rongnung Kurla nung Modi’er ki, Kala Ghonda tesem nung jewellery boutique, Bandra aser Lower Parel nung company indang tesem asem, Gujarat kübok Surat nung par kiojen asem aser Delhi kübok Chanakyapuri aser Defence Colony na nung Modi indang showroom tem lir.
ED-i CBI FIR ka reprangdangba sülen pa anema Prevention of Money Laundering Act (PMLA) kübok ken o ka benok. ED-i ashiba agi, sen crore 280.70 agi Punjab National Bank ashioktsüba atema 2017 küm CBI-i Modi, par adianu, pa kinüngtsü aser business partner nunger anema ken o benoka liasü.
CBI-i FIR benokba nungji Modi’er ki, par adianu Nishal, kinüngtsü Ami aser Mehul Chinubhai Choksi nunger (parnok ajak Diamond R US, Solar Exports & Stellar Diamonds nung partners lir) den bank ketdangser ana- Gokulnath Shetty (tangbo mapa nungi anisüngzükogo) aser Manoj Kharat nunger tenüng lir.
Arishi küm 46, Modi ya India nunger takartibatem tarensen, Forbes’ list nunga densema lir.
Modi den tangartem jagi Punjab National Bank nung inyaker ketdangser ana den tasa tamajung yanglur bank ashioktsü, ta Punjab National Bank-i tai tongloktsüba nung ajemdaker CBI-i parnok anema ken o benok.
CBI FIR nungji yamai shia lir, “Sorkar tenzükertemi pei menden tim mesüi amshia Diamond R US, Solar Exports, Stellar Diamonds nem maongka agutsü, aser ibaji ajanga 2017 küm Punjab National Bank sen crore 280.70 takoksa angu.”
Punjab National Bank-i taküm Aenjeti (January) 29 nü CBI nem Nirav Modi anema ken o agutsü, ajisüaka Modi bo Aenjeti 1 nü linük toktsür liasü.
Ano Modi’er adianu, kinüngtsü aser business partner nungera Aenjeti mezüng hopta nungsa linük toktsür liasü.
Tang Modi ya Switzerland nung atsüka lir, aser Ato kilonser, Narendra Modi-i CEO tem den tangokba noksa nunga pa densema liasü.
Modi ashikülak mapaji 2016 küm PMO nem metetdaktsür liasü: Cong
Ano tanga osang ka nung, iba ken o nung Centre sorkar aija tanü Congress-i, jewellery designer, Nirav Modi ashikülak mapaji 2016 küm July ita nung Prime Minister’s Office (PMO) nem metetdaktsür liasü, ajisüaka sorkari kecha meinyak, ta aitsü.
Congress party otongdar, Randeep Surjewala-i, “Nisung ka tenüng agi, Hari Prasad-i 2016 küm July 26 nü ken o ka agutsü aser PMO-i ibaji agizük, aser iba osangji Ato kilonser, Narendra Modi nema metetdaktsür liasü. Ajisüaka iba atemaji sorkari kecha meinyak. Bank takoksa nguogo aser tai tonglokja alisangbo jenogo,” ta metetdaktsü.
Nirav Modi anema FIR 42 benoka alibaji Ato kilonser, Modi-ia meteta lir, ta shia Congress lenir, Surjewala-i Finance Ministry densema sorkar ketdangsertemi kecha meinyakba atema aitsü.
“Sen auyar jendaktsübaji Centre nung Narendra Modi-i aniba sorkar indang maitsü ka kümogo,” ta paisa aitsü.
“Inyakyim shidak meinyak. Shibai Nirav Modi kümzüka ayur?” ta paisa asüngdang.
Tanep Congress Tir, Rahul Gandhi-i twitter ajanga Centre sorkarji India auyadakdaktsütsü atema lenmang sayur ka lir, ta aija liasü.