Election tangatetba melenshidi

Nagaland nung nisung aikati election nung pei indang vote-bo sen tera yong yoka chiadok sernung terenlok maliba indang nemnemer aser sorkar majung ta ola tashii adoka ayimtener. Naga nunger aika dak iba tangatetba aliba ajanga asen lima nung terenlok mali aser tejakleni maoer. Election nung asenoki süpokrem meshia agiba, sen mesüra rongsen penpua meshimetsüa agiba ajanga asen lima nung küm pungu tsüngda mapa kecha meinyaki dang süir. Terenlok maliba aser state jenjang mejungi akümba atema asenoki sorkar dak tai tongloktsür saka tai tulubajibo asenok public dak ang keta lir. Nagaland nung gari lenmangtem tajung aginüra, tzü peria ngunüra, tangar ama asen state-a tejakleni odaktsünüra, tamasa sorkar yimsüsür shimba inyakyim asoshi asen tangatetba melenshidima. Election agitsü ta osang angashiba sülen nungi nisung karbo joko candidate tem dang nungi sen meshia agir alitsü akok mesüra meshimetsüa jajaya alitsü südi. Iba ya kanga dang tesempatsü inyakyim ka lir aser nisung dang maakyonga Tsüngrem dang danga aaker teinyak ta ajungshir. ‘Kü nem sen meyirjang paikaji agütsüra, nü nem vote agütsütsü’, ‘Ozü nem sen paikaji agütsüra, ozü kibong ajungai nü nem vote agütsütsü’, ‘Ozü kiyonger nem sen paikaji agütsüra, kiyonger ajaki nü nem vote agütsütsü’, ‘Onok lanurtem nem sen peria dang agütsüra, onoki na nungita yaritsü’ ta Naga nungertem senzütepdar. Iba ajanga taruba sorkarji shiri kümtetdir kümtetang, terenlok kecha balaka bener marui kümsük atemtsü ta asüba tia sayuadoker. Külen Clean Election indangbo jembir saka ano külenbo teka salar meshimetsüa senzür ta süra, asen tangatetba kong noktaka lir? Election nungbo sen mesüra rongsen meshia agiadok saka iba candidate ji takok ngua sorkar menden nung amenba sülenbo, pai/lai mapa kecha meinyaktsür, yimtsüng, kiyong constituency atema kecha meinyaktsür ta nai ang jembia senzür. Election mapang nai nü indang vote candidate dang yoka chiadoker nung kodaser nai nür candidate anema o jembitsü nüma atanger? Candidate kati election nung sen crore-sa crore endokbaji angati atema dang asütsü asü? Kodanga masütsü. Pa/lai iba senji meyipa angutsü merangtsü aser tia kaa election nung takok ngua sorkar nung züngsem kümra, pa/lai sen kodaser angutsü ta tangatetba nung inyaktsü. Hao, candidate ajakibo iba tangatetba nungji meinyaker alitsü akok saka teimba kati yamaji inyaka arur aser iba yongji asen lima iba tia nung lir. Anungji, tanü Naga nungertemi election mashileni angateta aliba ya metongshia angatettsü kanga nüngdak aser ibaji asü nung dang asen lima tejakleni aotsü. Arungma, alima dang Naga nungera iba tashi angateta lirko ta sayutsü aser tangar nem tatishitsü tajung agidaktsütsü atema tan assembly election nung asenoki ochishia shilem agitsü merangdangdi.