Election ya kechi ?

Election ya senso ka temeten jangjaba mapang lir, anungji senso ajaki shilem agitsüla. Tsüngremi nisung ajak Pa mesükba nung kasasa jenjang nung yanglu ta asüba mapaji election ajanga jangjar, kechiyong election mapangbo tulur tilar aser takar sensaker kecha tebendang mali ajak kasasa jenjang ka nung züngshir. Tulur aser takartema nisung shia vote kaka dang aser tilar aser sensakertema vote kaka dang aser iba tashiji amshia yimsüsür shimtsübaji pei mulung lir. Yimten nung nüchisoji yang nung jagi tenzüker. Iba jagi election mapangbo tulur takartemiang angüma lur tilar aser sensakertem nübo ayimtsüla adoker. Iba tashi aser temetenji meteta senso ajaki yimten mapa nung shilem agitsübaji kanga tongtibang lir. Atangji, election mapang ya nübortemi yimsüsürtem shimba mapang lir, anungji alima ajungtsü asü majungtsübaji election nung shimba yimsüsürtem dak tuluka keta lir. Tetezü election mapang ya alima yanglutsü tenzükba tongtibang mapang ka lir. Iba tangatetba nung nübortemi alima yanglutsü shisatsü aser temetetba aliba purtem shimtsü merangtsüla. Asenok ajak tia majung taoba election aika mejungi agia aruogo. Election mapang candidate-i pa mesüra la election-i aiba nükjidong lokti senden nung ashiba mangshidang aser nübortem rongnunga election mapang yimten aser lokti tebilemtsü aser taginüba onük benoka jembiba talangka mangashi. Asenok election agia aruba yimyaji yimten ken o jembia yimsüsürtem shimtetba mapa ka amato masü saka shishilembadak oset ayoker aser alir amato sen otsü dang jembia süidaktsüba asenoki aiben ajangshiogo. Iba jagi tanü asen lima nung terenlok inyakba mapatem mangur aser terenlok mapa inyakba otsü jembiba mangashir. Election agiba indang ya jungjunga bilemdangra, ibai alima yanglutsü asoshi telemtetba agiba mapang lir. Aginü maginü ta masü alima ya yimten  yimsüsürtemi yanglur aser yanglutsü, anungji election mapang asenoki shimtetba yimsüsürtemji asenok alitsüba lima yanglurtem lir ta asenoki angateta shimtsü junger. Iba jagi asenok nem kechikoma yimsüsür ka nüngdaker ta asüba shisatsü aser tangatetba agütsütsü. Asenoki aginüba ama tarutsü lima tajungba tajungba yanglua aotsü asoshi telemtetba agitsü atema election agir ser nung, asenoki mangateti asen temeten mezüngmeshia amshiba agi tarutsü putu dang masü saka tanü putu dena asenoki menentsür. Election ya vote ayokba aser aliba mapa ka masü mesüra tashiyim amshia raratepba mapanga masü. Election ya nübortem rongnung senso shia nem yimten nung temeten agütsüba tashi amshia pelatepa telemtetba agiba mapang lir. Election agiba ajanga senso ka taküm meraketdaktsür. Election ya mali ser kin kidong tulu apia yimsüsürtem shim asübo kin tila purtembo koba jenjang nung lila ta bilemdangtsübajia tongtibang lir. Aji oda, election ajanga dang kin tulu tila kecha tebendang maka kasasa kümdaktsüogo. Iba maongkaji angateta, election mapang nung senso shiai pei temeten meyoki ochishia shilem agiba ajanga senso ka taküm akümketa litettsü. Taoba küm ishika tsüngda asen lima nung election agiba sülen nübortem taküm jenjang reprangdangra senso aika alar tia nung alir ama lia angur. Election mapang nungbo candidate-i anepalua jembir saka election temerbo ajurunüaka majurutet timtema tangar lar amato senzüba angur. Atangji, senso kati peii shimtetba yimsüsür majurutetbaji maksü, anungji tebilemdangtsü tuluka lir. Election ta süra nübortem mulungjangi jet ta arubaji sen ta dang bilemer. Atangji, election  ajanga yimsüsürtem shimer külen nübortem asoshi sen yanglutsü. Ajisüaka, senbo talubosa angur aser senso shinga mapa meinyaker ta aliba limaji tesamaleni aor asütsü. Iba ama limaji memenui ” yangi mapang ka nung yim ka liasü,’ ta longpak nung zülur angutsü. Iba amaji mataloktsüsa senso shiai election nung timi shilem agitsüla aser yimsüsürtemi mapang mapang shia nübortem den shisalemsatepa alima terenlok mapatem inyaktsüla.