FIFA WC Qualifiers: Sweden-i, Italy 1-0 agi akok

Stockholm, November 11 (Agencies): Sweden aser Italy na tsüngda World Cup playoff first leg asaya nung Sweden nunger substitute asayar Jakob Johansson-i asaya tanabuba shilem nung aita goal ka idaktsüba sülen parnoki 1-0 agi kokogo. Asaya tetenzüklen Italy nunger asayar Andrea Belotti tekolak agi goal idaktsütsü asoshi merangba dak alaker asaya peyong parnoki goal idaktsütsü asoshi maongka tajung mongutet. Iba telok ana tsüngda taruba küm Russia nung asayatsü asoshi jenjang ka atema asayadar aser Hombarnü Milan nung tanabuba leg asayatsü. Asaya mezüngbuba shilem tashi nung telok kati danga goal magütsütet, saka asaya minute 47buba nung Johansson, Albin Ekdal melena aitba sülen minute pezüshi or pai goal ka idaktsü, aser iba goal ajanga parnoki takok angu. Matteo Darmian-i goal kasasa kümdaktsütsü asoshi maongka nguteta liasü saka pai metsüba ball post nung ondaker adok. Iba tamakok ajanga Italy nunger 1958 küm nungi tang tashi nung iba asayamung nung khen danga methei shilem agia aruba otsü raksaa shilem magitettsüsa jenjang kati iogo.