Gauri Lankesh tepsetba aitsür: NPA

Dimapur, Sept. 09 (TYO): Gauri Lankesh Patrike yimobilem zülur aser senior journalist, Gauri Lankesh tepsetba osang angazüka iba tatalokbaji Nagaland Press Association (NPA)-i sashia aitsür, ta tanü state nung osangbenertem ajak tenüng nung NPA-i sangdong ka ajanga metetdaktsü.
September 5, 2017 aonung mejangjaba nisung kari Bengaluru nung lar kima la khaset; Gauri-i Hindu right-wing anema ola adoka aruogo aser tashi tulu aliba tentettem anema-a lai ola adoka aruogo.
“Lai la tangatetbatem nung ajemdaker nokdakba ajanga la taküm samaogo. Tangatetba balala atema raraba mesüra tepsetbaji tim masü. Democracy lima nung melungmasüba atema ola adoktsü aser pei tangatetba jembitsü atema lateta lir. Democracy aser temzüng-ozüng den mapet inyakba atema ochi temeten agütsütsü asoshi judiciary lir. Raraba mesüra tepsetbaji democray anema inyakba dang masü saka meimchir yimya den-a mapet. Nisungtem tangatetba balala latettsü atema lenmang tajungtibaji ken o jembiba lir,” ta NPA-isa metetdaktsü.
“Tanga media den külemi NPA-ia aibelenertem pua temerenshi agütsütsü akhanger. Gauri Lankesh tepsetba yimya nung ajemdaker yimtenren aitdaktsüba aser media sasep nunga telemsa adokba atema NPA-i tebilemtsü akar,” ta NPA sangdong nungsa shia lir.
“Democracy nung tongshi pezübuba ama asenoki (media) asen teinyaktsü tim inyaktsüla- ochi atema nokdaktsüla,” ta Nagaland Press Association-isa metetdaktsü.