Governor Acharya-i Shilpgram Mahotsav-2018 lapoktsü

Dimapur, Aenjeti 18 (TYO): Nagaland Angh aser North East Zone Cultural Centre (NEZCC) mendenpuba, PB Acharya-i Guwahati nung Aenjeti 17, 2018 anogo Shilpgram Mahotsav-2018 sentong lapoktsüba mapang jembidang, north east nung aliba state tem nung jembiba oshi aser sobaliba wazüka ayutsü asohi ajungshi.
Anogo asem amungtsü aliba Cultural festival lapoktsüba sentong nung jembidang, Governor Acharya-i, asenoki asen indang sobaliba, yimsüyimpong aser oshioben wazüka ayutsüla, kechiyong item aya asen temaitsü aser item ajanga asenok ya jangja meteter, ta ashi. ‘Unity in diversity’ ya India atema alakteta lir, aser state balala tsüngta ‘cultural exchange’ sentong akaba ajanga linük longjemdaktsüba nung takok angutsü, ta Angh-i ashi.
Asemnü amungtsü aliba “Shilpgram Mahotsav” ya Guwahati nung Shilpgram tenzüker küm 12 ajungba nüngtem nung shilem ka ama ayongzük. Iba benjongmung indang tongtibangtiba nükjidong ya north east region nung amshiba sobaliba sayutsü aser North East India den külemi linük tesem ajunga nungi Zonal Cultural Centre tem nungia shilem agitsü atema lir. Iba sentong nung theatre presentation, magic show, mimi show, tanurtem noksa yangluba aser sentsü atepba indang workshop, Assam nungi nüngtugu kentenertemi folk fusion kentem atenba den külemi choreographed folk dance, classical dance, chiyongtsü aser ola-angla amshiba teka mapatem amala sayutsü.
Local art aser craft tem temaba jenjangi ajungkettsü mechi Ministry of Culture ajanga Shilpgram ya 2006 nung tenzüktsü.