Govt High School, Singrijan Higher Sec.-i upgrade süogo

Dimapur, December 07 (TYO): Government High School, Singrijan agi Government Higher Secondary School jenjangi ajungketba atema Singrijan aser temeket nung alir nüburtem kanga mulung chiogo.
Brihostibarnü state School Education Minister, Tokheho Yepthomi-i Higher secondary school atema nüngshilong sayatsü aser Government High School, Singrijan nungi Government Higher Secondary School ajungketba osang sangdong.
Iba sentong nung school education department nungi ketdangsertem, public lenirtem, tesayurtem aser kaketshirtem dena liasü.
Ita 4-5 tejaklena Tokheho-i School Education department agizüka liasü aser pai ashiba agi, iba department ya kodamasü jenajang ka nung lir, ibayongji department inyakyim tajungba akumtsü atema pai inyakdar, ta metetdaktsü.
Paisa tesayur temelen meinyakdaktsütsüla, kechiyong ibaji ajanga kaketshirtem jenjang aser shisaliok jenjang raksatsütsü, ta ashi.
Paisa iba tesem nung aliba nüburtem dang iba school ajungkettsü atema loingjemer inyaktsü mepishi.
Taruba küm nungibo class agitettsüsa higher secondary section atema class takdang tasen yanglutsütsü, ta paisa nangzük.
Sentong nung DEO, Dimapur, R Amongla-ia, nüburtemi shilem agitsüji kanga tongibang, anungji iba school ya Dimapur nung school tajungtiba rongnung ka, ta züngsemtsü atema longjemer inyaktsüla, ta ayongzük.
Ano Assistant Head Master, T. Shitiri-ia shidi ka ajanga minister dang school atema nüngdakaba temepishiba kar agütsü.
Kasa sentong nungsa Selouphe village nungi GB, Pfunilie, Kiyeto village, GB, Benjamin Aye, Tsethrongse village, GB, Tsethrongse, Diezephe village, Chekroveyi Kenyo, Bade village aser VCC, Kesalie Thopi nungeria o tatsütsü jembia liasü.
Tanep Associate Pastor, Toluzuma, Wenyipe Swuro-i meshiteta sarasademtsü aser Singrijan, VCC, Dig Bahadur-i lokti pelaa agizükba o jembia liasü.