HPC-i sarusaji atema bushitetba osang mapa küma inyaktsüla : ACAUT

Dimapur, July 6 (TYO) : Naga yimten teloktem, state sorkar aser mulungtet teloktemi alimelen saru agiba aser ozüng anema sarusajiba indang inyakyim bushisüngdangtsü atema state sorkari High Powered Committee (HPC) ka shima mapa nungloktsü aser June 10, 2015 nü HPC-i bushitetba osang Chief minister ket nung agütsüogo, ta Media Cell, ACAUT Nagaland-i sangdong ka ajanga metetdaktsü.
Anungji, Justice HK Sema, Supreme Court of India Judge (retd) lenisüba kübok HPC-i anibelem arema bushitetba osang aser inyaktsü junger ta tebilemba shidangba ajakji sorkari agizüka mapa küma inyaktsüla, ta ACAUT-isa sangdong nung shia lir.
Naga nungertem asoshi HPC-i bushitetba ajakji mapa küma inyaktsüla aser ACAUT Nagaland-i Justice HK Sema aser züngsem ajak dang parnoki state ajungtsü atema mapa tajung inyakba atema pelar aser tenüngsang agütsür.
Tesüiba küm ka tashi ACAUT Nagaland-i State Lokayukta Act yanglutsü atema takhangba agüja arur aser maneni taruba Nagaland Legislative Assembly Monsoon Session nung iba Act yanglutsüla ta takhangba agütsür.
ACAUT Nagaland-i October 2014 nungi tenzüker state sorkar dang aiben Lokayukta tenzüktsü atema temepishiba aika agüja arur saka tanü tashi telangzüba kecha mali. Anungji state aser sensosanger ajak ajungtsü mechi ochimashi inyakyim azüoktsü atema State Lokayukta Act tenzüktsüla ta Media Cell sangdong nungsa shia lir.