Imlibenla Wati-i mepishia metetdaktsür

Dimapur, December 16 (TYO) : Naga nunger lokti nung nisungtemi ozüng alema mapa tamajung marendaki dang inyakba angudang temulung raksar, ta Miss Nagaland 2012, Imlibenla Wati-i sangdong ka nung metetdaktsü.
Taoba Miss Nagaland Imlibenla ya tang Miss World Beauty India lir aser iba denji Brand Ambassador of Tourism and Humanity, Miss Pan Continental World 2015 lir.
Laisa sangdong nung ashiba agi, nisung kati tangar ka dak taochi melii timtem aser tejashi bener arutsüba dang masü saka mapayui dang taküm dena agir aser iba ama tensa angudang temulung kanga aronger.
Khristan tem teimba ser aliba state ka nung iba tensa ajuruba atema temulung raksar aser nisung ka takümji kanga senti lir anungji shingaia nisung ka taküm agitsü mesüra tashiyim inyaktsü temeten mali, ta Imlibenla Wati-isa sangdong nung metetdaktsü.
“Tawa Dimapur nung tetsür shishilembar ka tepsetba tatalokba aser ano Nagaland nung ozüng alema mapa inyakbatem ya tangatetba shitak aliba senso ajaki aitsütsüla ta ni ayongzüker. Iba den külemi ozüng amertemia aibelenertem pua ozüng kübok merenshitsü mepishia metetdaktsür” ta laisa sangdong nung shia lir.