India aser lenirtemi Arunachal sadoksadoka semdangtsü akok: MEA

New Delhi, November 09 (Agencies): Tawa India Defence Minister, Nirmala Sitharaman-i Arunachal Pradesh semdangba China-i ashishia liasü, aser iba dak sendakba nung tanü India-i, Arunachal ya linük indang shilem ka lir, anungji India nunger lenirtemi sadok sadoka iba state tesem ajak semdangtsü akok, ta ashi.
External Affairs Ministry otongdar, Raveesh Kumar-i, “Arunachal Pradesh ya India indang shilem ka lir aser India nunger lenirtemi linük nung state balala semdangba ama Arunachal-a sadoksadoka semdangtsü akok,” ta ashi.
India aser China tsüngda arrtsü mangatettep onük nung linük anaprogla nungi ketdangsertem senden amentsü aliba dak sendakba nung tasüngdangba ka langzüdang Kumar-i iba o ya jembia liasü.
“Linük anapronglai tongtepratepa jembidar. Ken o jembitsü atema anogojibo onoki ano melemtet. Kodang anogoji lemtetdir onoki nenok nem metetdaktsütsü,” ta paisa ashi.
Honibar aser Deobarnü Defence Minister, Sitharaman-i tang mezüng Arunachal Pradesh semdanga liasü, iba sülen Hombarnü China-i ibaji ashishia jembi.
Arunachal semdangba mapang nung Sitharaman-i China den arrtsülen aliba Anjaw district kübok army post tem semdanga defence terenemba asadanga liasü.
China-i, sen billion aika jenjang Belt and Road Initiative (BRI) nung India tangatetbaji mejangja, ta jembiba dak sendakba nung Kumar-i, iba onük nung India tangatetbaji kanga tejangja, ta ashi.
China-i Arunachal Pradesh ya South Tibet shilem ka lir, ta ashir, ibayongji India lenirtemi iba state semdangba shia China-i ashishira arur.
Bodhbarnü China-i, BRI onük nung India tangatetbaji mejangja, aser iba project dak sendakba CPEC nung arrtsü mangatettep densema lir ta India-i jembiaka yamaji masü, ta ashi.
China-i, US sen billion 50 indang CPEC connectivity project ya ajanga Kashmir onük mekongshir, iba onükji India aser Pakistan tsüngda ken o jembiba ajanga latettsüla, ta ashi.