India-China nati tuluka inyaktettsü: Dalai Lama

New Delhi, November 19 (Agencies): Tibet nunger lenir, Dalai Lama-i, India aser China nati senteperbo tuluka inyaktettsü, ta ashi.
1989 küm Nobel Peace Prize angusang, Dalai Lama-i, “Asenoki aginüaka-maginüaka India aser China nati yaritepa alitsüla, aser linük anati longjemer inyakra tuluka inyaktettsü. Nisung billion ana dang tema (linük ana nütsüng)-i longjemr inyakra komaka asütsü,” ta ashi.
“Putiotsü nung China linük-a Buddhist linük ka lir. China nunger aikati Buddhist tamangba yimsü nung Nalanda tangatetba sülen anidaker,” ta pai osangbenertem dang ashi.
Bihar yimtiba, Patna nungi kilometer 90 pilar aliba Nalanda ya Buddhist monastery indang tiyongtsü ka liasü. 1959 küm yimtenren asüngsangshiba mapang nung Dalai Lama-i Tibet toktsür India-i jena aru, aser tang tashi pa India nung jenoka alir.
China-ibo pa ya lendong aketba separatist lenir ka lir, ta ashir aser bendanger ketdangsertemi pa ajurubaji China-i ashishia arur.
Dalai Lama-i tang anogo 50 nü linük nung tesem balala sema senzü tenzükogo aser December ita nung pai Bodh Gaya semdangtsü. Tang Dalia Lama-i hopta ka tsüngda yimti asem- Delhi, Bhubaneshwar aser Kolkata tesemdangdak lir.
Bodh Gaya Temple Management Committee züngsem, Arvind Kumar Singh-i, “December 26 nü Dalai Lama, Bodh Gaya tonga arutsü. Pai anogo 50 nü sentong tenzükogo. Pa Bodh Gaya nung amongba mapang nung pai January 5-7 anogotem aser January 14-16 anogotem nung Kalchakra Maidan nung o jembitsü,” ta metetdaktsü.