India nunger sepai ka süra Pak nunger sepai 10 asütsüla: Amarinder Singh

New Delhi, Aenjeti 18 (Agencies): Pakistan nunger sepaitem aser kiralongrartemi Jammu & Kashmir nung India linük arrtsü adena aitba aser ceasefire ozüng alema inyakba anema Congress Party lenir tain aser Punjab Chief Minister, Amarinder Singh-i, Indian army temi kidanger (Pakistan) linük anema sashia inyaktsüla, ta metetdaktsü.
“Asen sepai ka süra par (Pakistan) sepai 10 asütsüla. Ibaji kü tangatetba lir,” ta Captain Amarinder Singh-isa ashi.
Singh ya mapang talangka Indian armed forces nung tenüka liasü aser 1965 küm India-Pakistan Rara mapang nunga Captain ka liasü.
Tanep Jammu & Kashmir kübok R S Pura sector nung aliba International arrtsü nung Pakistan sepaitemi injang yokdang Border Security Force (BSF) nung sepai ka tenüng agi, Suresh asü, aser iba dak sendakba nung Congress leniri iba o ya jembiogo.
Border Security Force (BSF) DG, KK Sharma-ia, “Asenoki sashia meyiptsüogo, aser ibaji ajanga par (Pakistan) tsütsülena takoksa angu. BSF-i kodanga rara metenzüker, ajisüaka tangari tenzükra onoki sashia meyiptsür. Head Constable A Suresh-i taküm tenla agütsbaji amajok masütsü,” ta metetdaktsü.
“Onok raraba tesem anasaji ayong tila ka lir. Parnok arrtsü adena aiteter lila, ajisüaka asen sepaitemi itemji nokdangteter,” ta paisa ashi.