India nungi jakzüker ka UK nung ‘Child Genius’ sempet angu

London, August 21 (Agencies): Nüngtugu television quiz tetoktepba ka nung India nungi jakzüker arishi küm 12 tain tebur kati asüngdangba ajak shidak langzüteta United Kingdom indang ‘Child Genius’ sempet angu.
Channel 4 indang ‘Child Genius’ show final nung Rahul Doshi-i arishi küm 9 tain, Ronan madak 10-4 agi akok. Pai taoba mapang asüngdangba ajunga shidak langzüteta nüburtem ajaki pa sapua aküm.
19buba century nung alir artist William Holman Hunt aser John Everett Millais na indang tasüngdangba shidak langzütetba sülen North London nung azüngsang-i iba takok marok ya ngutet.
Rahul-i final nung pai shimtetba subject – Edward Jenner’s medical innovation & methodology in 18th Century England – nungi shisatsü tajung sayutet.
“Ni nüma adangba agi tenük nungi nüktzü alu,” ta Rahul tebu aser IT manager, Minesh-i ashi. Hopta junga sayuba iba sentong nung tokteper temi math, English, spelling aser history den parnok indang memory tashi amshia toktepa aruba sülen final ya agi.
Iba tetoktepba mezüng round aser taoba round nunga Rahul-i junga shilem agiba ajanga iba tetoktepba takok marok ya pai angutsü südi, ta nüburtemi imla liasü. Iba tetoktepba nung pai terepranger indang tebilembatem pai puzükteta liasü.
Rahul ya financial adviser ka akümtsü nükjidong lir aser pai iba tetoktepba nung takok anguba tasa ya, “Inyaksangshi ajunga amadoker süngjema aliba ya takok anguba nung shilem tulutiba lir. Anungji nü indang nükjidong nung temolung agüjang. Akok tashi asüngdangba ajunga shidak langzür süngjema alitsü aser tetenzükdang junga inyaktsü ya kü indang nükjidong liasü,” ta ashi.
Rahul yu Mensa club nung züngsem ka lir aser pa indang IQ ya Albert Einstein dang temaba lir, ta amanger aser iba show mapang pa tebu Minesh aser tetsü Komal nati pa pusema aru.
Iba tetoktepba final nung Rahul den toktepsang, Ronan-i telangzüba tai akütsüba ajanga Rahul tebu kanga menu aser iba ajanga social media nung pa kanga aitsü.
“#ChildGenius tanurtemi telangzüba tai agütsüdang teintet nisung kati menüba yimya ya tesüngmangtsü lir. Nüsasa aaktsüla,” ta Twitter amshir kati zülutsü. Saka iba tetoktepba nung Minesh Doshi ya kanga tasü ita nokdak.
“Onok yangi akoktsü atema aru. Iba atema lenmang ana mali,” ta Manish-i iba tetoktepba tetenzüklen shia liasü.
‘Child Genius’ 2017 series nung tanur arishi küm ti nungi 12 tsüngda parnok 20-i shilem agia liasü.