India o Pak na Shanghai Cooperation Organization nung adentsü: Putin

Ufa, July 10 (Agencies): India aser Pakistan nati Shanghai Cooperation Organization (SCO) nung züngsemtsü lemtetba osang ka Russia Tir, Vladimir Putin-i yashi Hokolbar nü metetdaktsüogo.

Russia aser China nati aniba SCO telok nung tesüiba mapang nung Soviet Union kübok densemba aser Central Asia nung tentetba linüktem züngsema aliba osang jangjaogo.

European Union (EU) aser North Atlantic Treaty Organization (NATO) na densema West linüktemi külemi lungjemer tentetba tentet balalai inyakba ama inyakteptsü nükjidong nung Central Asia nung densemba linüktemi iba SCO ya 2001 küm tentetba osanga jangjaogo.

SCO nung züngsemba ajanga India-ia Central Asia nung adokba energy den sentakba tajangzük jenti ngutettsü lir.

India Ato Kilonser, Narendra Modi-ia tan Russia semdangba sülen SCO nung züngsemba Kazakhstan, Kyrgyzstan, Tajikistan aser Uzbekistan linüktema semdangtsü sentong renema lir.

“India aser Pakistan nati SCO nung züngsemtsü lemtetogo,” ta shia, Putin-i yashi SCO senden tenzükja liasü.

Paisa ashiba agi, Belarus linüki Afghanistan, Iran aser Mongolia nunger den densema SCO senden nung tetendanger ama shilem agitsü renemogo.

Ozüng alema mozümora shibelenertemi Afghanistan tsütsülen nungi mozümora shibelentsü merangba aser kiralongrabaren anema takok ngua raratsü asoshi SCO züngsemtemi külemi lungjemer amalitepa inyakteptsü tajungshiba olen ka Putin-isa yashi lemsatepa liasü.