iPhone Slowdown asüba tebilemtsü atema Software Update sütsütsü

Aenjeti 19, 2018 (Agencies): Apple company ajanga software update ka yakta sayatsü aser iba ajanga battery ajema akümdang iPhone slowdown südaktsüba features tem shibanga ayutsü asoshi tamshirtem nem maongka agütsütsü, ta Executive Tim Cook told ABC News dang ashi.Apple puri parnok indang iOS software test version ka taruba ita agütsütsü aser iba ajanga tamshirtem dang battery tashi sayutsü. Iba ajanga phone slowdown südaktsüba features tem shibangtettsü aser iPhones aoksa shibangadokba amla nungi kümzüktettsü, ta cook-i ABC news den sensaksemba mapang nung ashi.
Cook-i ashiba agi, phone-slowing software ya yaküm küm release asü aser iba ya phone battery tejen akümba ajanga iPhone amshirtem call tesüdak aser text tesüdak nung phone shutdown asüba nungi kümzüktsü. “Nüngdak makaba nung restart masütsü atema onoki nü indang phone inyakyim tera tajemba kümdaktsütsü, aser nai maginera nai shibanga yutettsü. Saka onokibo aji recommend masür kechiyong nüburtem atema parnok indang iPhone ji kanga tongtibang lir aser asenoki koba mapang nung ang tongtibang nüngdak adoktsüar memetet. Onok inyakyim ajak ya tamshirtem nem service tajung agütsütsüba atema lir,” ta Cook-i ashi.
Iba update ya customer tem nem kodang agütsütsü, ta asüngdangba nung Apple nung otongdar kati Cook-i ashiba dak alaka kecha telangzüba magütsü. Apple company ajanga taoba Lichii (December) 20 nü iPhone 6, iPhone 6s aser iPhone SE models tem nung battery tashi meite akümba achaayangtsü atema software agütsüba ajanga phone slowdown südaktsütsü akok ta shiogo. Iba sülen anogo ishika tsüngda nung phone slow down asüba dak sendakba nung Apple pur anema ken o benoka liasü.
Iba ken o ya social media nung kanga bulua jembi tenzük aser Apple puri nüburtem nem phone tasen alidaktsütsü mechi nung asaa phone tejentem slowdown südaktsür ta o adok. Ajisüaka iba taitsüba ya nungittsüsa kuli kecha mongutet. Luchii 28 nü Apple puri battery nung tebilemtsü adokba dak sendakba nung nüburtem dang tatok meshia zülutsü aser parnoki ashiba agi, iba ya asaa inyakba maparen ka masü, ta ashi.
Maneni Apple puri battery jenjang dena sen $79 aliba nung $29 kümdaktsü aser iba ajanga customer tem phone tasen alitsü melena battery dang melentsü asoshi maongka agütsü. Battery nung jenjang ajemtsüba ajanga 2018 küm iPhone ayokba tajemba akümtsü akok, ta Barclays analysts-i iba ita tetenzüklen metetdaktsü.