IS nung mapa inyaktsü jangrar ka Delhi nung pua lir

New Delhi, August 07 (Agencies): Tesüiba mapang osangbener mapa inyaka alir, Mumbai nungi arishi küm 48 tain ka Delhi nung Iraq Embassy kima lia pua lir. Pa ya Islamic State (IS) nung otongdar mapa tazüng aliba nung apply asütsüba atema pa indang curriculum vitae/CV, IS dangi yoktsü mepishitsü atema Delhi-i Iraq Embassy bushia aruba liasü.

Iba mapang Iraq embassy ajanga police tem nem osang agütsü aser parnoki Zubair Khan pua asüngdangya südar.

Khan ya anogo asem tejakdang Delhi tonga aru aser IS nung otongdar mapa atema apply asüba nung yaritsü asoshi pai ‘Press Council of India’ office-i oa certificate ka asüngdanga liasü, ta police-i ashi.

Delhi Police-i ashiba agi, Khan ya tekolok tera meshidak amai lir saka pa nükjidong ajanga Intelligence Bureau aser tanga agency tem den Mumbai anti-terror squad dena kanga makmakshimakdaktsür.

Zubair Khan-i pa India senso yutsür IS den adentsü ta Facebook nung enoktsüba, Facebook amshir kati police nem osang agütsüba sülen Mumbai police-i pa bushitsü tenzüka liasü.

Pa adianu Fakruddin Khan-i, Zubair meyong Facebook account tangari tim mesüi amshir ta ashiba mapang “Zubair ya kiralongrar masü…..pai Facebook nung teti tajemzük tia nung alirtem pusema zülur,” ta ashi.

Mumbai Police cyber cell ajanga pai Facebook nung enoktsübatem bushisüngdangtsü tenzükogo.

Police-isa ashiba agi, Zubair Khan ya mapang talangka kecha meinyaki arur aser tang mapa tebushidak lir. Pa ya master degree ana aliba nisung lir, ka mass communication nung aser tanabubaji public administration nung.

Taoba hopta tatemlen Centre nung tongti nisungtem aser state 10 nungi police nung lenirtem sendena tang Syria aser Iraq amokbanger aliba IS teloki inyakyim rasaa jembiogo.

Tesüiba ita 18 tsüngdang nung India nungi Muslim amanger kija parnok nisung 13 IS den adentsü asoshi linük toktsür ao, ta sorkar sangdong ka ajanga NDTV dang shiogo. Parnok rongnung trokbo taküm samaogo.