Ita sen agizükba industry !

Tanübo mapang talangka temulungjang nung Nagaland state government ya kechi (?) ta shisadanga bilemdangdang, Nagaland nung state government ya tanga kecha masü saka ita sen agizükba industry-ang ka mesük ta angatetogo. Ano, ken bilemtsübo Nagaland state ya ita sen aser mapa meinyaki aluzüka agiba sen aongba süngdongang ka mesük. Ibayongji, lenmang mejungaka kecha masü, mozü kidang taneptsü manguyonga kecha masü, govt school nung shinga mazüngyonga kecha masü, alu shingaia mayimyonga kecha masü, government melenpet melenyonga kecha masü, kechiyong ita senbo angur aser mapa meinyakba sen aika alepzüka agitetter. Iba amai anogo 30 shia ita sen agizükba industry ka amendaka yur kecha  shisabolu maka alitsübaji Naga nungertemi jangratema bilemer. Ajisüaka, ibaji Laishiba nung shitak mesükba lenmang ka lir saka tatembangji tasüba ta asüba amai lir. Jungjunga bilemdangra, mapa meinyaki angati anguba sen agi jangratema alirtemji tepuokdak alirtem amai lir. Parnok aientsü aser tajungba akümtsübaji teimla tulukabo mali. Kecha shisabolu melii ita sen angati agirtemji kilirtem lir. Iba jenjang nung jagi asenok adoker kibur akümtsü merangtsüla.Iba ama tangatetba kati aruagi asenoki ita sen agizükba industry masü saka sen yangluba industry-tem lapoktsüsa asenok assembly nung, asenok secretariat aser Directorate nung aser asenok kidang jembi tenzüktsüla. Tangbo assembly nunga tatartem ita sen atutsü indang dang jembir, office nunga inyakertem ita sen agi tenük masüngba indang dang jembir aser kidanga ita sen chia alitsü mapa tilaka danga angu nunga jungla ta dang jembir. Aji oda, asenok temulungjang aser tenük ajungaji ita sen dak dang rangloka lir. Aji oda, state tenzükdang nungi asenok nükjidongji ita sen chia ayongayonga alitsü bilema tenzük asünungji, joko state kümer küm 50 süidangbo kibong shia ita sen achir agi sünga lir. Ibaji asenok atema takok ta mezüngshitsüla. Nagaland state atema shitakba takokjibo kodang asenoki asen lima nung meiba süngolemba, süngdonglidong aser süngjanglijang agi tagitsü aser tayoktsü küma renemtsüsa industry lapoka inyaktetdir, ibaji dang Nagaland state asoshi takok osangji asütsü. Asen lima nung tanga lima nung ama industry tulu melapoktettsüa akok, saka asenoka asen yari industry tilalabo yimtsüng shia lapoktettsü. Industry ta kodang südir asenoki industry yabo town nung dang lapoktsü amai bilemer, saka industry-ji kong kechisarina yanglutsü nüngdakba oset angur aser mapa inyaktsü purtem lir, yangji lapoker. Aji oda, lanur kari nashi metsüa nashi mamatsü agi yangluba chiyongtsü tapu balala yanglutsüa akok, nisung kari manü aser ponglashi agi chiyongtsü tapu balala yangluba industry lapoktsüa akok, nisung karibo süng aser süngküm agi chikok, chisang, auso, spoon, fork, tebu tushiba aser süng agi kechisarina gari sünga yanglur tangaleni yoktsüsa yangluba industry lapoktsüa akok, karibo ak shi, nashishi aser anshi agi chiyongtsü tapu balala yangluba industry lapoktsüa akok. Item amaji nisungtem nüngdak reprangteta inyaktsü mapatem aika lir. Itemji tsüraburtemi meinyaktettsü. Ashiko, yimsüsür aser tulurtemia lenmang mesayutettsüa akok. Ibayongji, parnoki lanurtem dang kechisüdir süaka meranga zünger government ita sen achitsüsa government mapa bushitsü dang ajungshitsüa akok. Atangji, gvernment mapajia junger aser karibosa inyaktsüla. Ajisüaka, tanü lanurtem asoshibo mezüng nükjidongji government mapa masütsüla. Pei alidak aser pei yimtsüng nung ali peria akadak industry tapu balala lapoka mapa inyaker meinyakma adokdakja inyaktsübaji tanü lanurtem nükjidong asütsüla. Aji oda, pei tenüng kodanga mamatsüsa pei tenüng nung nübortem asoshi nüngdak oset mesüra chiyongtsü ka yangluteta toktsüra, ibajibo pa mesüra la asoshi alimai arua langa asütsü.