Jackie Shroff-i tsünüsenpongtsü tsütsü rangloker

Tsüklai (February) 8, 2018 (Agencies): Tawa, actor Jackie Shroff-i pai Lucky Morani indang Iranian-Indian film Devil’s Daughter nungja nung shilem tila ka agitsü lir, ta ashi. “screen nung ni jembiba ajak agi iba ya oshi 12buba alitsü. Oshi 11 tashi ni jembia aruogo, aser oshi 12buba bendenloka jembiba ya kanga jangratemtsü lir. Film nung ni shilem tila ka dang agir saka iba indang tangbo ni aika meshitsttsü,” ta India-Iran film indang medemdanga jembiba nung pai ashi.
Housefull 3 nung actor Jackie, Tsüklai (February) 1 nü arishi küm 61 jungogo aser arishi küm nung tain kümaka, pai kangabo balaka ama mebilemer. “Ni atema kecha temelenshiba mali, ni teti dang temulung süa aser peria dang alir. Ni lia aruba mapang kü dak kecha maliasü aser tanü tashi ni kechisa ajangzük, item ajakji ni bilemba dang nungi timba lir,” ta paisa shia liasü. Pa dang Firrkie, Paltan aser Saaho indang film yangluba nung tatemlen ka lir.
Ajisüaka, taküm nungi tenzüka pai jangraba maparen kar nung ranglokner. “Ni teti dang tsünüsenpongtsü maparen tsütsü inyaknüa liasü aser ni iba nung timba rangloka inyaktsü. Tzü wazüka ayutsü atema nüburtemia shilem agia mapa küma inyaktsü südi, ta ni bilemer. Tzü atema asenoki panel discussion mesüra live debates agitsü menüngdaker. Asenoki aji mapa küma inyaka sayutsüla. Aamir Khan-i ‘Paani Foundation’ nung shilem agia mapa tulu ka inyakdar aser asenoki ibaji ajizüka inyaktsüla,” ta Shroff-isa ashi.
Tawa, Akhil Bhartiya Marathi Chitrapat Mahamandal’s Kalasanskurti Stars off Screen sentong nung Vikram Gokhale ajanga Jackie Shroff-i award ka agizüka lir. Actor tejen Jackie ket nung sempet aika lir aser pai ashiba agi, ibaji film reprangertemi tepela temaitsü sayuba lir aser ibaji ajanga ano mapa tajungba inyaktsü jangradaktsür, ta ashi.