Jackie Shroff-i ‘Ventilator’ film tasenba nung shilem agitsü

Mumbai, Tsüklai 03, 2018 (Agencies): National Award anguba Marathi film ‘Ventilator’ Gujarati oshi nung yanglushitsü, aser iba film nung tongti shilemji Bollywood actor, Jackie Shroff-i agitsü.
Iba film ji Irada Entertainment-i produce asütsü aser tang mezüng Jackie Shroff-i Gujarati cinema nung shilem agir asütsü.
Iba dak sendakba nung Shroff-i sangdong ka ajanga, “Tatemsa, ni ozü tetsü oshi, Gujarati film nung shilem agitsü. Ni iba nungji imlaba ama ni junga shilem junga agitsü ta amanger,” ta metetdaktsü.
Ventilator ya actress, Priyanka Chopra-i produce süa liasü.
Iba film otsü nung, Ganpati benjung atongtsü anogo ishika dang lia kibong ka nung züngsem tain ka shiranga ‘ventilator’ nung ayur, aser ibaji ajanga par kibong aoksaba tensa ka ajurur.
Iba film tasenbaji Gujarati film otsü zülur nüngtugu, Niren Bhatt-i zülu aser otsü züluba nung Karan Vyas-i yaritepa lir. Iba film ya Umang Vyas-i direct asütsü.
Mezüng sayaba Ventilator film director ji, Rajesh Mapuskar liasü, aser pai film tasenba direct asüba nung yariteptsü.