Janata Dal (U)-i Nagaland assembly elections nung tokteptsü

Kohima, Aenjeti (January) 13 (TYO): Taruba Nagaland Legislative Assembly Elections nung Janata Dal (United)-i tokteptsü.
Küptoknü (Honibar) Kohima nung JD (U) Nagaland senden ka amendang 14 buba Nagaland Legislative Assembly nung “Development for Naga people” kübok tokteptsü telemtetba agi.
Convener JD (U) Nagaland NSN Lotha lenisüba kübok JD (U)-i Nagaland nung tokteptsü ta JD (U) Secretary General KC Tyagi (ex-MP)-i osangbener dang ashi.
Ajisüaka, Election Commission of India (ECI)-i election agitsü anogo ano memetetdaktsüba agi pai menden kwi nungi tokteptsü’ar mashi.
Election mapang kechi onük atema jembitsü ta osangbeneri asüngdangdang Tyagi-i “Development for Naga people” omen nung jembitsü ta langzü.
“Nagaland nung sorkar melentepa ketdangsüa arudang Centre-i senotsü aika agütsüogo saka terenlok aser tejakleni aoba mali. Iba atema JD (U)-i teküpokba jenjang nungi ochimashi agientsü atema inyaktsü” ta paisa metetdaktsü.
“JD (U) nem sorkar ketdangsütsü atema tashi agütsür, senotsü timi amshitsü aser Nagaland nung kechisarena ajaklen terenlok bentsür arutsü” ta Tyagi-isa shisem.
Bihar Chief Minister Nitish Kumar-i Nagaland nung party aser candidate tem atea nüboyimtsütsü kanga jangrar ta paisa ashi.
Senden nung Nagaland JD (U) Convenor NSN Lotha-i, “tang teinyakdak MLA karibo party dang ticket meshiogo” ta ashi saka pai tenüngtembo memetetdaktsü.
JD(U)-i Democratic Alliance Nagaland(DAN) teloktep nung adenba meyipa reprangshitsü aser iba atema telemtetba ka agitsü, ta NSN Lotha-isa shisem
DAN teloktep nung NPF, BJP, NCP aser JD(U) party tem dena lir.
Taoba Chief Minister Neiphiu Rio atema OSD inyaksang YM Humtsoe-i JD(U) party nung denogo aser pai taruba elections nung tokteptsü ta Nagaland JD (U) Convenor-isa metetdaktsü.
Aenjeti (January) ita tatemlen Nagaland State Unit, JD(U)-i Jantar Mantar, New Delhi nung “Dharna” ka ayonga agitsü. Iba sentong ya Nagaland aser northeast dak sendakba tebilemtsütem metetdaktsütsü atema agitsü.