Japan PM Abe aser kinungtsü nati India semdanger

New Delhi, September 13 (Agencies): Bodbarnü Japan Prime Minister Shinzo-i Gujurat kübok Ahmedabad airport nung anenzük. Pai anogo ana atema India semdanger aser tanü PM Modi-i pa pelaa agizük.
Japan Prime Minister Abe aser pa kinungtsü Akie Abe na Ahmedabad airport nung ceremonial reception agütsü aser idakji guard of honour agütsüba sülen Abe, pa kinungtsü aser PM Modi nungertemi kilometer 8 road show ka atema apusoa ao.
Parnoki Sabarmati Ashram semdang aser idakji Abe aser kinungtsü nati Mahatma Gandhi nem akhüm tetushi agütsü.
Tenatisa Sabarmati Ashram nung aliba visitor’s book nung sign asü aser idak nungjagi Sidi Saiyyid Ni Jaali ta ser putu 16 buba nung yangluba mosque semdang.
Shinzo Abe aser Narendra Modi na Brihotsibar nungi tenzüktsü aliba India-Japan summit nung adentsü. Tenatisa Ahmedabad aser Mumbai tsüngda India nung mezüngbuba bullet train project indang lung azünga yutsütsü aser India-Japan business plenary meeting nunga adentsü.