J&K nung civilian 2 den sepai ka khaset

Jammu, Aenjeti (January) 19 (Agencies): Tanü Jammu & Kashmir nung aliba India-Pakistan International Border (IB) kübok Jammu aser Samba districts nung Pakistan sepaitemi sheels den injang yokba lendong nung civilian ana aser Border Security Force (BSF) sepai ka khaset, ta tanü ketdangsertemi metetdaktsü.
Ketdangsertemisa, iba tatalokba nung BSF head constable ka yiru, aser tesülen mekümzükteti asü, ta metetdaktsü.
Pakistan Rangers-i tanü agi anogo ananübuba Jammu aser Samba district na nung International arrtsülen civilian aliba tesemtem aser border posts nung shells aser injang sashia yokdang civilian ana asü aser asem yiru, ta ketdangsertemi metetdaktsü.
Yasünga linük ana arrtsülen Pakistan sepaitemi injang yokdang Border Security Force (BSF) Head Constable, A Suresh asü, iba sülen Indian sepaitemia injang sashia meyiptsü.
International arrtsü nung tensa kanga majung, ta shia BSF Director General (DG), K K Sharma-i Field Commanders dang injang sashia meyipjang aser Pakistan sepaitem dang tansütsü ka sayuang, ta tetuyuba agüja liasü.
Bodhbar aonunga RS Pura sector nung Pakistan sepaitemi ceasefire ozüng alema shells aser injang yokdang BSF sepai ka den arishi küm 13 aiür chanu ka khaseta liasü.
Iba dak sendakba nung taoba mapang Jammu & Kashmir Chief Minister, Omar Abdullah-i, mapang shia ceasefire alema inyakba anentsü atema India aser Pakistan nati tekaratiba nung mera agia inyaktsüla, ta shiogo.