Kiburi Kilir dang kulisüba

~ Aowabang Ozüküm, Guwahati : Assam.

Filemon aser Onesima otsü ya aiben pulpit nungi mejembir saka iba shidi nung ya tanü putu tendak alirtem asoshi tangatettsü tulu ka lir ama bilemer aser iba indang tangatetba tatsü agi lemsateper.
Filemon ya Paul ajanga temulung meyipa amangdaktsü. Pa takar nisung ka liasü. Anungji par kidang kilir aser alartem liasü, aser item rongnung Onesima ya-a ka lir. Saka mapang ka nung iba kilir Onesima yagi par kibur oset aser rongsen auya bener kidang nungi ajen. Iba alar kidangi nungi jener senzüba mapang Paul ajurua temulung meyip aser iba sülen Pauli pa tanaben kibur Filemon dang meyipa yok. Pauli Filemon dang temepishiba ka Onesima asoshi liasü aser aji ” joko alar ama masü, saka alar dang nungi taoba temeim adianu….” ( vs 16 ) ka ama agizüktsü asoshi mepishia zülu. Pauli Filemon dangi zülu dang alar mesüra kilir mayutsüla ta mashi saka kidang alir aser alartemji adianu/ adianutsü ka ama agizüka amshitsü asoshi mepishi. Paul nükjidongji, Khristan kibur aser Khristan kilir tsüngda nung Khrista temeim ajanga kati ka akümtsübutepa, tesendaktep tajung nung alitsüla indang tesayuba pai züluba shiditem nung angutsü. Paul tebilembaji kibur aser kilirji kaa ama tebendang mali alitsü asoshi ashir masü saka asen tangatetba melenshitsü asoshi ashir.
Iba otsü yagi asenok dang tenyaktsü mapa ka tuyur ama bilemer. Tanü iba putu nung alar mali saka ajak kidang ama kilir tesem balala nung anir arua asen kidang lidagi. Süra Khristan ka ama, item kidang alirtemji kilir ka ka ama bilemer asü adianu aser adianutsü ka ka ama bilemer. Asen kidang alir kilirtem dang asenoki Tsüngrem indang kulisüba nung tamakok küma lir asü ?. Asen kidang Tsüngrem memetetba nübur aser kin nungi arua asen kidang alibaji Tsüngrem temeim indang shia amangdaktsütsü maongka tajung ta anagateta kwi kati parnok kuli süa amangdakja ali ?
Filemonji tamanger ka saka pai Onisema dang Tsüngrem temeim indang mashi ama talangi moaka asen kidang alir dangi, iba kulisüba nung asenoki tamakok ngua lira, asenok Tsüngrem tsüngdang sentsühtsür ka akümer ta angatetdi. Kibong tekülem nung parnoka külemi dena agir asü koda ?
Saka tanü asen kidang alirtem dang Tsüngrem temeim indang ashitsübabo yutsur, parnok dang tim mesüi benshiba tang timba osang lir. Asenoki asen meküta aliba states nung oa Tsüngrem mapa tulu inyaker aser item nüburtem asen lima nung school zünga lidaktsütsü aika anir arur, saka aseni oa sayuba aser arua asen libaliro meputep. Schoolia meyoki mapa dang inyakdaktsüba, Tsüngrem O masü o tamajung dang shia arütsüa teti merenshia ali nung, tajung masü saka tamajungang aika angazüker meyipa aoer. Asen kidang alirtemji kiburtemia süang, arogotemia süang home mission ka ama angateta asen den aliba mapang Tsüngrem temeim indang jungjunga shir amangdaktsüra, kulisuba mapang nung takok ngua inyakba rongnung ajia ka südisü ta bilemer. Ajak kidang ama kilir kakabosa lir, aser aikati parnok dang kulisüa alitsü, saka ki kibur ajaki, ni ya kulisür ka ta angateta asen kidang alirtem den iba mapa inyak nung jungdina ta bilemba ka lemsateper. Tsüngremi moajang.