Kiralongrartem azüoktsü atema atsü atsüjang : Pak

Islamabad, Tsüklai 09 (Agencies) : Afghanistan den tashishitep aliba arrtsülen Pakistan nungeri meranga atsü atsübangtsü merangdar aser ibaji renemtsü atema US nunger nem sen agi yaridaktsüner, ta Pakistan-i mepishia metetdaktsüogo.
Afghanistan den arrtsü nung tenemkonglen mile 1,456 songtema atsü yanglutsü maparen tenzüka lir saka senotsü peria maliba ajanga ano tang tashi nung noklang shilem nung 10 danga tajemba dang renemogo.
Yamaji süaka, 2019 küm tatem tashi nungbo ibaji renemtsü tebilemba lir, ta Pakistan Foreign Minister Khawaja Muhammad Asif-i metetdaktsüogo.
“Parnok atemabo ibaji khuret tulu masütsü. Tongpang nungang parnoki senotsü teimba endoker,” ta Islamabad yimti nung senden ka alidang Asif-i US atishia shiogo.
Paisa ashiba agi, anogoshia iba arrtsü adena nisung 70,000 shi jajar aser kiralongrartemi iba maongkaji agir anungji kiralongrartem azüoktsü asoshi atsü yanglutsüji nüngdaker.
Trump-i Pakistan nunger anema jembiba indang asüngdangba ka langzüdang, “Pakistan nungeribo US den tesendaktepji tajungba yanglushiner,” ta paisa metetdaktsü.