Kisama anasa NH 29 nung lishitzü ayimer

Kohima, August 20 (TYO) : Tsünglu kena maneni aruba ajanga Kisama anasa Phesama nunger lushi kübok Kohima nungi Manipur leni aiba National Highway 29 nung lishitzü kanga sashia ayimba agi Brehostibar anepdang nungi gari mesenzüteti kümogo.
Iba osangji angashia Southern Angami Assembly Constituency nungi adoksang MLA Vikho-o Yhoshü, Kohima DC, Rovilato Mor, Chief Engineer in Chief, Chief Engineer Road & Bridges, S.P. Kohima, Project Director Kohima, Kevipodi, SDO (c) Jakhama nungertemi lishitzü agi lenmang ajak nokdanga ayimdak tesem tonga oa semdanga liasü.
Iba tesem nungji Manipur leni aoba Blue Hill Bus ka mouteti belepboka ayuba ajanga tanga garitema mesenzüteti nokdanga lir.
Manipur aser Nagaland na prongla tsütsü senzür gari 200 shi iba tesemji ajanga mouteti anendena lir. Iba jagi mapa inyakertem aser kaketshitem pei aotsüba tesem metongteti timtemdagi.
Iba lenmangji akok tashi tekaraba nung lapoktsütsü asoshi Police, district administration, BRO, Traffic Police, St. Joseph Jakhama nungi NCC purtem aser Phesama Youth Organization purtem ajaki kanga meranga inyakdagi.
Phesama Youth Organization nung tir, Medokolie-i lenmangji kanga junga melapok tashi khu tulu abenba gari mesenzüi alitsü asoshi mepishia metetdaktsüogo aser ano iba ama nisungtem timtem ajuruba mapang taxi anishirtemi sen talila memeshitsüla ta tekümdangtsü o ka metetdaktsü.
Nisung kar koda masüba timtem tasümang mesüra shirangertem bener aotsüsa kümra yangji yariteper volunteer-tem dang ashitsü metetdaktsüogo.