Kohima nung “Intensified Mission Indradhanush” workshop agi

October 04, 2017 nü Hotel Vivor, Kohima nung Addl. Director, Family Welfare, Dr. Tia Jamir-i “Intensified Mission Indradhanush” sensitization workshop nung jembiba noksa nung angur.

Kohima, October 04 (TYO): National Health Mission Nagaland-i ayongzüka aser UNICEF-i nungita October 04, 2017 nü Hotel Vivor, Kohima nung “Intensified Mission Indradhanush” sensitization workshop agia liasü.
Okila jembidang Addl. Director, Family Welfare, Dr. Tia Jamir-i osangbenertem aser iba mission nung stakeholders ajak dang jila aser yimtsüngtem, talisa yimtsüngtem aser tezülen aliba tesemtem nung awareness agütsüba nung tongtibang shilem agitsü ayongzük.
Pai ashiba agi, awareness junga magütsüba ajanga health dak sendakba immunization programmes nung tangar dang nungi Nagaland kanga tesülen atsüngzüka lir.
Immunization ya kanga nüngdak aser tongtibang, ta shia paisa melungtet teloktem aser Arogotem dang melungteta department den yaritepa inyaktsüla, kechiyong parnok kijai dangbo 2018 küm December ita tashi nung shilem 90 ayimjemtsü atema aliba nükjidongtem mataloktsü, ta metetdaktsü.
Paisa, immunization indang tongtibangtiba nükjidongji, teyari nüngdakba nübur ayimjemtsü atema lir, ta metetdaktsü.
2015 küm tenzükba Intensified Mission Indradhanush kübok junga meinyakba district tem rongnung state nung aliba district 11 prongla lir, ta pai metetdaktsü.
Technical session nung Dr. Pairson-i power point presentation ajanga Nagaland & Intensified Mission Indradhanush Immunization status metetdaktsü, aser Dr. Sheila-i nükjidong aser asalentongtem metetdaktsü.
Ano UNICEF nungi Dr. Longri-ia Intensified Mission Indradhanush nung stakeholders indang shilem balala power point presentation ajanga metetdaktsü.
SIO Nagaland, Dr. Visasieu Kire-i lokti pelaa agizükba o jembi, aser SPO, NAM, Dr. Thangoilam-i tepela anküp o jembia liasü.