Kohima nungi teshimtet telok kati Aizawl City semdang; Aizawl nungbo traffic jam majurur; horn mamshir

Dimapur, October 18 (TYO) : October 12, 2015 nü Joseph Hesso, Sr. Superintendent of Police, Kohima-i Aizawl semdangtsü atema ‘exposure trip cum study tour’ lapoktsü.
Iba telok nung Kohima Traffic Police, 15 NAP (IR) Mahila personnel, Kohima Municipal Council, All Nagaland Taxi Association aser City Bus Owners’ Union of Kohima züngsemtem liasü aser parnoki October 13 nungi 15 tashi Aizawl yimti nung mungzüka liasü, ta Sub-Divisional Police Officer & PRO Kohima-i sangdong ka nung metetdaktsü.
Aizawl City Traffic maparen inyakba reprangtsü aser ajizüktsü atema iba exposure trip ya ayongzüka agi aser S.P. Traffic, Aizawl-i Nagaland nungi aoertem pelaa agizükba sülen L.T. Hrangchal, IPS, DIG, Northern Range, Mizoram tongti tesemdanger ama tarurtem pelaa agizükba sentong ka agi,
Aizawl City nung inyakyim metettsü atema taoertem telok pezü lemsa aser parnokji, Kohima Traffic Police, KMC, ANTA aser CBOUK liasü aser telok shiai pei pei yongrü nung teloktem – Aizawl Traffic Police, Aizawl Municipal Council, Aizawl Taxi Association aser Aizawl City Bus Owners’ Union nungertem den ajurutep.
Kohima Traffic Police den 15 NAP (IR) personnel teloki Aizawl yimti nung tesem balala semdanga idakji traffic management & control reprang. Parnokisa Solomon’s Temple, Mizoram University, Millennium Centre semdang aser aonung ATC Durtlang nungi Aizawl City reprang, ta sangdong nungsa shia lir.
Kohima jila nung ama Aizawl nunga gari lenmang temesü aser lenmang tilala aika lir saka Aizawl City nungbo traffic timtem kecha maliasü.
Aizawl nung traffic jam mashibo majurur aser yimti kübok tesem timbaka NO HONKING ZONE lir aser traffic personnel temia teka ayiploktsüba dak alaka whistle kangabo mamshir, ta sangdong nungsa metetdaktsü.
Aizawl nung alirtemi traffic rules aser guidelines kanga junga meteta lir aser iba jagi Traffic officers medeni traffic constables-i dang traffic azüokteter. Parnoki lane driving tetuyuba sülen kanga junga anidaker aser rongdak nüngdak ka mesüra tanga gari ajateta manir.
Nagaland nungi aoer exposure trip teloki Aizawl semdangba sülen October 15 nü parnok meyipa apuso aser October 16 nü Kohima tonga aruogo. Iba sentong ayongzüka agiba atema DGP Nagaland aser DGP Aizawl na dang kanga pelar aser ano S.P. Traffic, Aizawl City-i teyari tulu agütsüba atema kanga pelar, ta Sub-Divisional Police Officer & PRO Kohima-i sangdong nungsa shia lir.